كەشە استانا قالاسىنىڭ اكىمى, «نۇر وتان» حالىقتىق – دەموكراتيالىق پارتياسى استانا قالالىق فيليالىنىڭ توراعاسى يمانعالي تاسماعامبەتوۆ قىتاي كوممۋنيستىك پارتياسىنىڭ دەلەگاتسياسىمەن كەزدەستى.
كورشى ەل دەلەگاتسياسىن قىتاي كوممۋنيستىك پارتياسىنىڭ بيۋرو مۇشەسى, قكپ وك ۇيىمداستىرۋ ءبولىمىنىڭ مەڭگەرۋشىسى چجاو لەتسزي باستاپ كەلدى.
قالالىق پارتيا فيليالىنىڭ عيماراتىندا بولعان باسقوسۋدا پارتياارالىق ارىپتەستىك ماسەلەلەر تالقىلاندى. قالا باسشىسى قىتاي مەن قازاقستاننىڭ ءداستۇرلى ىنتىماقتاستىعىن ەرەكشە اتاپ ءوتتى. بۇگىندە ەكى ەل اراسىنداعى ديپلوماتيالىق قارىم-قاتىناس ستراتەگيالىق سەرىكتەستىكتىڭ جاڭا دەڭگەيىنە كوتەرىلگەنى بەلگىلى. ءوز سوزىندە استانا قالاسىنىڭ اكىمى يمانعالي تاسماعامبەتوۆ كەلگەن قوناقتارعا پارتيانىڭ قىزمەتى, ەكى ەل پارتيالارىنىڭ ورتاق ۇقساستىقتارى جانە ەلوردانىڭ دامۋ قارقىنىنا توقتالدى. «بۇگىندە ەلىمىزدە قىتايدىڭ بىرنەشە كاسىپورىندارى جۇمىس ىستەيدى. ەكى ەل اراسىنداعى ساۋدا-ساتتىق, تاۋار اينالىمى وتكەن جىلمەن سالىستىرعاندا ەداۋىر ارتتى. قوس ەل پارتيالارىنىڭ ىنتىماقتاستىعىن ودان ءارى نىعايتۋ جانە تەرەڭدەتۋ ەكى ەل اراسىنداعى تاتۋ كورشىلىك بايلانىستى دامىتۋدا ماڭىزدى ءرول اتقارادى» دەدى يمانعالي نۇرعاليۇلى.
سونىمەن قاتار, استانا قالاسىنا رەسمي ساپارمەن كەلگەن قوناقتار پرەزيدەنت اكىمشىلىگىنىڭ باسشىسى كارىم ماسىموۆپەن, «نۇر وتان» حدپ توراعاسىنىڭ ءبىرىنشى ورىنباسارى باۋىرجان بايبەكپەن جانە نازارباەۆ ۋنيۆەرسيتەتىندە وقيتىن جاستارمەن كەزدەسكەن.
گۇلميرا ايماعانبەت
