بۇگىن باس قالاداعى قازاقستان مۇسىلماندارى ءدىني باسقارماسىنىڭ (قمدب) عيماراتىندا «ىزگىلىك جارشىسى» دەگەن اتاۋمەن ءمۇفتيات جۋرناليستەرىنىڭ رەسپۋبليكالىق مەديافورۋمى ءوتتى. القالى جيىن قۇران اياتتارىن وقۋمەن باستالىپ, ءدىن مەن مەديا جايلى ارنايى دايىندالعان بەينەروليك كورسەتىلدى.
جۋرناليستەردىڭ كاسىبي مەرەكەسى قارساڭىندا ۇيىمداستىرىلعان مەديافورۋمعا قمدب توراعاسى, باس ءمۇفتي ناۋرىزباي قاجى تاعانۇلى, «Egemen Qazaqstan» رەسپۋبليكالىق گازەتىنىڭ باس رەداكتورى عابيت مۇسىرەپ, «ايقىن» گازەتىنىڭ باس رەداكتورى امانگەلدى قۇرمەتۇلى, «Túrkistan» گازەتىنىڭ باس رەداكتورى باۋىرجان باباجانۇلى, «استانا اقشامى» گازەتىنىڭ شەف-رەداكتورى تولەن تىلەۋباي جانە بەلگىلى تەلەجۋرناليست, تانىمال ديكتور زەيىن الىپبەك, سونداي-اق قمدب-نىڭ ايماقتارداعى تىلشىلەرى, ءباسپاسوز بويىنشا وكىلدەرى قاتىستى.
باسقوسۋدى اشىپ, ءسوز سويلەگەن باس ءمۇفتي قازاق حالقى ەجەلدەن ءسوزدى قاستەرلەگەنىن, ءسوزدىڭ پارقىن ايىرا بىلۋگە باۋلىعانىن ايتا كەلىپ, ءسوز ۇستاعان, قالامنىڭ قاسيەتىن ۇعىنعان جاندار ءدىن تاقىرىبىن قوزعاردا اسا اباي بولۋى كەرەكتىگىن تىلگە تيەك ەتتى. «ءدىن نازىك ماسەلە بولعاندىقتان, بۇل تاقىرىپقا اسقان جاۋاپكەرشىلىكپەن قاراۋ قاجەت. ويتكەنى ادامنىڭ سەنىمى – وعان قايرات بەرەتىن كۇش ءارى پەندەنىڭ ەڭ ءالسىز تۇسى. سوندىقتان بىرەۋدىڭ سەنىمىن قورلاۋدان ارتىق قيانات جوق» دەدى ناۋرىزباي قاجى تاعانۇلى. ول اقپارات الاڭىندا ءتۇرلى كەرەعار پىكىرلەردىڭ بولىپ جاتاتىنىن, سونداي پىكىرتالاستاردىڭ ادامنىڭ جەكە باسىنا ءتيىسۋ, ءدىني سەنىمىن مانسۇقتاۋ, ابىرويىن توگۋ سەكىلدى باعىت الىپ كەتەتىنىنە قىنجىلىپ, كوركەم پىكىرتالاستاردىڭ كورىنىس تاپپاي جاتقانىنا الاڭداۋشىلىق ءبىلدىردى.
«ارداقتى پايعامبارىمىز (وعان اللانىڭ سالەمى مەن سالاۋاتى بولسىن): «جاقسى ءسوز سويلە نەمەسە ۇندەمە», – دەگەن. پايعامباردىڭ وسى ونەگەسى بار ءاربىر تۇيسىكتە جاڭعىرىپ تۇرسا دەيمىز. اللا تاعالا «حۋجۋرات» سۇرەسىنىڭ 6-اياتىندا: «ءاي, مۇمىندەر! بۇزىق بىرەۋ حابار كەلتىرسە, ونى انىقتاڭدار. ايتپەسە بىلمەي ءبىر ەلگە كەسىرلەرىڭ ءتيىپ, ىستەگەندەرىڭە وكىنەسىڭدەر», – دەيدى. اللا تاعالا جوعارىداعى اياتتا كەز-كەلگەن جاعىمسىز حاباردى ەلگە جايماس بۇرىن, الدىمەن انىقتاپ الۋدى بۇيىردى. ايتپەگەن جاعدايدا ەلگە كەسىرى ءتيىپ, وكىنىش ارقالايتىنىن ەسكەرتىپ وتىر. بۇرىن بابالارىمىز ەل ءىشىن بۇلدىرەتىن جانتۇرشىگەرلىك سۇمدىق سويقاندار مەن قاراجۇرەك قياناتتاردى «مال قۇلاعى ساڭىراۋ» دەپ, تامىر الىپ, تارالىپ كەتۋىنەن ساقتانىپ, ەلگە جايمايتىن. وكىنىشكە قاراي قازىر ادام قۇلاعىنا اۋىر ەستىلەتىن, توبە شاشىڭدى تىك تۇرعىزاتىن جەككورىنىشتى ءھام جيىركەنىشتى ىستەر ارامشوپتەي قاۋلاپ ءورشىپ بارا جاتقانى جانىڭدى اۋىرتادى» دەدى باس ءمۇفتي.
مەدياورۋمدا باق باسشىلارى, تانىمال جۋرناليستەر باق پەن ءدىن, جالعان جانە شىنايى اقپارات, ءدىني تاقىرىپتاردى باسپاسوزدە جازۋ, ءدىني سەكتالاردىڭ جالعان ۇراندارىنان جۇرتتى ساقتاندىرۋ, ءداستۇرلى باق پەن تسيفرلىق مەديانىڭ ءبىر-ءبىرىن تولىقتىرۋى جانە ت.ب. تاقىرىپتاردا ويلارىن ورتاعا سالدى.
بۇل جيىننىڭ ۇلكەن ءبىر جاڭالىعى – قمدب جانىنان باس رەداكتورلار القاسى قۇرىلدى. ونىڭ قۇرامىنا ەلىمىزدىڭ جەتەكشى گازەتتەرىنىڭ باسشىلارى, بەلگىلى جۋرناليستەر كىردى. القا ءۇش اي سايىن ءماجىلىس قۇرىپ, ءدىني سالاداعى تۇيتكىلدى ماسەلەلەردى اشىق تالقىلاپ, قوعامعا پايدالى, قاجەتتى اقپاراتتاردى جارىققا شىعارۋعا ىقپال ەتەدى.
