استاناداعى وقۋشىلار سارايىندا ەلوردا اكىمىنىڭ جاڭا جىلدىق شىرشاسى ءوتتى.
مەرەكەلىك شاراعا 300-گە جۋىق ءمۇمكىندىگى شەكتەۋلى بالالار, ارنايى تۇزەتۋ مەكتەپ-ينتەرناتىنىڭ تاربيەلەنۋشىلەرى جانە وزات وقۋشىلار جينالدى. جاڭا جىل كەشىنىڭ تاقىرىبى ەلباسىنىڭ «ۇلى دالانىڭ جەتى قىرى» ماقالاسىندا ايتىلعان وزەكتى ويلارىمەن ورىلگەن. ساحنا الەمى ەرتەگى مەن ەجەلگى قالالار بەينەسىمەن ۇيلەسىم تاۋىپ, ءتۇرلى اسەم بۇيىمدارمەن كوركەمدەلگەن. ال بالالار اسىعا كۇتكەن اياز اتا مەن اقشاقار «2019 جىل» دەگەن جازۋى بار مەرەكەلىك ەكسپرەسسپەن كەلىپ, بالالاردى تاڭعالدىردى.
دۋماندى كەشكە كەلگەن جەتكىنشەكتەردى قالا اكىمىنىڭ ورىنباسارى ەرمەك امانشاەۆ قۇتتىقتاپ, ولارعا ىزگى لەبىزىن ءبىلدىردى.
«جاڭا جىل – ەرەكشە مەرەكە. بارلىق ادام جاڭا جىلدان جاقسىلىق كۇتەدى. سىزدەر – ەلىمىزدىڭ ەرتەڭىسىزدەر. تاۋەلسىز قازاقستاننىڭ باس قالاسى استانادا تۇرىپ جاتىرسىزدار. سوندىقتان سىزدەردىڭ جاڭا جىلدى قىزىقتى قارسى الۋى ءۇشىن وسىنداي تاماشا كەش ۇسىنىپ وتىرمىز. جاڭا جىل بارىڭىزگە قۋانىش, باقىت اكەلسىن, اتا-انالارىڭىز امان بولسىن!» دەدى اكىم ورىنباسارى.
مەرەكەلىك قويىلىمنىڭ رەجيسسەرى, قازاقستاننىڭ حالىق ءارتىسى, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ كوركەمدىك جەتەكشىسى تالعات تەمەنوۆ ءوز سوزىندە حالقىمىزدىڭ تەرەڭ تاريحىن بالالارعا ەرتەگى الەمى ارقىلى جەتكىزگەنىن ايتتى.
