استانا كۇنى مەرەكەسى قارساڭىندا ەلوردادا «استانا-ايماقتىق ەلەكترجەلىلىك كومپانياسى» اكتسيونەرلىك قوعامىنىڭ جاڭا عيماراتى سالتاناتتى جاعدايدا اشىلدى.
جاڭا اكىمشىلىك-تۇرمىستىق كەشەننىڭ تۇساۋكەسەرىنە قاتىسقان استانا قالاسى اكىمىنىڭ ورىنباسارى ۆاسيلي كرىلوۆ «استانا-اەك» اق-نىڭ قالا دامۋىنداعى ەلەۋلى ۇلەسى بارىن ايتا كەلە, ەلوردا ەنەرگەتيكتەرىن تاماشا عيماراتتارىمەن جانە شاراعا قاتىسۋشىلاردى قالا كۇنى مەرەكەسىمەن شىن جۇرەكتەن قۇتتىقتاپ, يگى تىلەگىن جەتكىزدى. ودان سوڭ اتالمىش مەكەمەنىڭ باسشىسى الەكساندر سمورودين سالتاناتتى راسىمگە جينالعانداردى قازىرگى زامان تالابىنا ساي عيماراتتاعى جەدەل-ديسپەچەرلىك قىزمەت جۇمىسىمەن تانىستىردى.
جالپى الاڭى 11 775 شارشى مەتردى, ال اۋدانى 1,8 گا جەردى الىپ جاتقان عيماراتتىڭ وزىندىك ساۋلەت ەرەكشەلىگى دە جوق ەمەس. ول نەگىزگى ءۇش بلوكتان تۇرادى. مۇندا 600 ادامعا ارنالعان ءتورت جانە ەكى قاباتتىق كەڭسەلىك ورىنجايلارمەن بىرگە 120 ورىندىق كونفەرەنتس-زال, 200 ادامعا ەسەپتەلگەن اسحانا, ويىن جانە فيتنەس زالدارى بار ساۋىقتىرۋ بلوكتارى, ارناۋلى تەحنيكاعا ارنالعان 60 ورىندىق گاراج, 80 جەڭىل اۆتوكولىككە ارنالعان تۇراق, كولىك شەبەرحاناسى, كولىك جۋ, قويما جانە ت.ب. بار.
سونداي-اق, جاڭا عيماراتتىڭ ءبىرىنشى قاباتىندا قىزمەت كورسەتۋدى جەڭىلدەتۋ ماقساتىندا قالا جەلىلەرىنە قوسىلۋ جانە ەلەكتر ەنەرگياسىن ەسەپكە الۋ ماسەلەلەرى بويىنشا تۇتىنۋشىلاردى قابىلداۋ ءۇشىن بارلىق جاعداي قاراستىرىلعان. وندا ەلەكتروندىق كەزەك تە ۇيىمداستىرىلىپ, «ءبىر تەرەزە» قاعيداسى ەنگىزىلگەن.
شارا بارىسىندا جينالعاندار «استانا-اەك: ەنەرگيانى باسقارۋشى» اتتى ءفيلمدى تاماشالۋعا مۇمكىندىك الدى. سونىمەن بىرگە «ەكسپو-2017» تاقىرىبىندا اقپاراتتىق سەمينار وتكىزىلدى.
گۇلبارشىن وكەشقىزى
