جاڭالىقتار
جاس وتباسىلار سايىسى
«ۇلتتىق مەديتسينالىق حولدينگ» اق جانىنداعى فيليالىنىڭ ۇيىمداستىرۋىمەن «نۇر وتان» پارتياسىنىڭ 15 جىلدىعىنا ارنالعان «وتان وتباسىنان باستالادى» اتتى وتباسىلىق سايىس ءوتتى. وتباسى مارتەبەسىن ءوسىرىپ, ولارعا قولداۋ كورسەتۋگە باعىتتالعان بايقاۋعا بارلىعى التى وتباسى قاتىستى. ولار ەڭسەباەۆتار, بامىشەۆتار, تاجىعاليەۆتار, نۇرعاليەۆتار, قارساقباەۆ جانە قاليبەكوۆتار وتباسى.
ءىس-شارادا العاشقى بولىپ ءسوز العان قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى ماحاببات بەكبوسىنوۆا: «اكە, انا, بالا اراسىنداعى بايلانىستى نىعايتۋ ءۇشىن, وتباسى قۇندىلىعىن بەرىك ەتۋ ءۇشىن مۇنداي شارانى وتكىزۋدىڭ ماڭىزى زور» دەدى.
سايىستا اتا-انالاردان باستاپ ءۇش جاستاعى بىلدىرلاعان بالدىرعاندار دا ونەر كورسەتتى. بۇلدىرشىندەردىڭ ءبىرى دومبىرادا, ءبىرى تاقپاق ايتىپ, ەندى ءبىرى كەلىستىرىپ بي بيلەدى. قاي توپ بولماسىن, جەڭىسكە جەتۋ جولىندا نامىسقا تىرىسىپ, وزدەرىنىڭ مىقتىلىعىن دالەلدەۋ ءۇشىن بارىن سالىپ, كورەرمەندەرگە كوتەرىڭكى كوڭىل كۇي سىيلادى. جەڭىمپاز وتباسىلار باعالى سىيلىقتارمەن, ماقتاۋ قاعازدارىمەن ماراپاتتالدى.