ۇلى وتان سوعىسىنىڭ مايدانگەرى جانداربەك كاربەكوۆ ون جەتى جاسىندا-اق مايدانعا سۇرانعان ەدى.
اقمولا وبلىسىنىڭ قورعالجىن اۋدانىنا قاراستى سونالى اۋىلىنان اتتانعان جاپ-جاس جىگىت الدىمەن اشحاباد قالاسىنداعى سنايپەرلەر مەكتەبىندە وقيدى. ون سەگىز جاسقا تولىسىمەن سوعىسقا كىرىسەدى. مايدانداعى جورىعى اتاقتى 55-گۆارديالىق ديۆيزيانىڭ ەكىنشى بەلورۋسسيا مايدانىندا باستالادى. اسكەري باسشىلىقتان بىرنەشە العىس العان گۆارديا اعا سەرجانتى جانداربەك كاربەكوۆ بەلورۋسسيا, باتىس پرۋسسيا جانە پريبالتيكانىڭ ەلدى مەكەندەرىن فاشيستەردەن ازات ەتۋگە قاتىسادى. كەننيگسبەرگ قالاسى ءۇشىن بولعان قيان-كەسكى ۇرىستا سول قولىنان جارالانادى.
قايسار مىنەزدى قازاق جاۋىنگەرىنىڭ سوعىس كەزىندەگى ەڭ ءبىر ەستە قالعان وقيعاسى 1945 جىلدىڭ 29 ءساۋىرى كۇنى شىعىس پرۋسسيانىڭ «كوسى فريش نەرۋنگ» ايماعىن باسقىنشىلاردان ازات ەتۋ ءۇشىن بولعان شايقاس ەكەن. ەكى جاقتان ارتيللەريا, مينومەت جانە پۋلەمەتتەن وق بوراعان اتىس بارىسىندا ۆزۆود كومانديرى اۋىر جارالانىپ, باسشىلىق جاساۋعا جاراماي قالادى. وسى تاعدىرلى تۇستا جانداربەك كاربەكوۆ باسشىلىقتى ءوز قولىنا الىپ, ۆزۆود جاۋىنگەرلەرىن شابۋىلعا باستايدى.
سول قىرعىندا 27 ءفاشيستىڭ كوزى جويىلادى. جانداربەكتىڭ ءوزى جاۋ جاسىرىنعان بلينداجدى گراناتامەن جايراتادى. وسى شايقاستاعى ەرلىگى ءۇشىن جانداربەك كاربەكوۆتىڭ كەۋدەسىنە 1945 جىلى 9 مامىر كۇنى «قىزىل جۇلدىز» وردەنى قادالادى.
كەۋدەسىندە وردەن-مەدالدارى جارقىراپ ەلگە ورالعان جانداربەك قايداۋىلۇلى ەڭبەك مايدانىندا دا مايتالمان اتاندى. ۇزاق جىلدار قورعالجىن اۋدانىنىڭ شارۋاشىلىقتارىندا, كراسنوزنامەن اۋدانىنىڭ اباي اتىنداعى كەڭشاردا زووتەحنيك بولىپ ەڭبەك ەتتى. قۇداي قوسقان قوساعى دامەجان ەكەۋى بەس ۇل, بەس قىز تاربيەلەپ ءوسىردى. ۇلدارى ۇياعا, قىزدارى قياعا قوندى. مايدانگەردىڭ اۋلەتىنەن 21 نەمەرە, 11 شوبەرە ءوردى. بۇگىندە ولاردىڭ ءبارى «باتىر انا» اتانعان دامەجان اجەلەرىنىڭ الديىمەن تەربەلىپ, ادامزاتقا بەيبىت ءومىر سىيلاعان ۇلى جەڭىسكە ۇلەس قوسقان جانداربەكتەي جاۋىنگەر اتالارىنىڭ رۋحىنا تاعزىم ەتىپ ءجۇر.
عالىم قوجابەكوۆ
