جازاسىن وتەپ, بوستاندىققا شىققان ادامدار الەۋمەتتىك ومىردەن شەت قالعاندىقتان, وزىمىزگە قالىپتى سانالاتىن ورتاعا جىلدام سىڭىسە قويمايدى. كەزىندە سوتتالىپ, ءتيىستى جازاسىن وتەگەنىن بىلسە دە, قوعام ولارعا ۇرەيلى دە كۇماندى كوزبەن قاراپ, ءوز قاتارىنا قوسۋدان تارتىنادى. ال, ولاردى ورتاعا بەيىمدەۋ جۇمىسى جۇزەگە اسا ما؟ وسىنى انىقتاۋ ءۇشىن «اقتالۋشىلىق تەحنولوگيالار مەن تۇجىرىمدامالار» قوعامدىق قورىنىڭ باسشىسى ورىنباسار مولداشقىزىن اڭگىمەگە تارتتىق.
– ءوزىڭىز ويلاڭىزشى, تۋعان-تۋىسقانى جوق ادامدار دا بار. ولار بوستاندىققا شىققاندا, نە ىستەرىن, قايدا بارارىن بىلمەي دال بولادى. قالتاسىندا ءبىر تيىنى جوق ادام شاراسى جوقتان قىلمىسقا بارماسىنا كىم كەپىل؟ ياعني, ولاردى ومىرگە قايتا بەيىمدەۋ وتە ماڭىزدى ماسەلە.
– وسى ورايدا ناقتى قانداي ىستەر اتقارىلۋدا؟
– تۇرمەدە وتىرىپ شىققاندارعا قۇقىقتىق جانە پسيحولوگيالىق كومەك كورسەتەمىز. مۇنداي ادامدارمەن ارنايى زاڭگەرىمىز بەن پسيحولوگتارىمىز جۇمىس جاسايدى. قۇجاتتارىن قالپىنا كەلتىرىپ, مەديتسينالىق جاردەم الۋىن قامتاماسىز ەتۋگە تىرىسامىز. ءتۇرلى ماسەلەلەر استانا قالاسىنداعى مەملەكەتتىك ورگاندارمەن تىعىز بايلانىس ورناتۋ ارقىلى شەشىلەدى. بۇرىنعى سوتتالعانداردى ماماندىق
بويىنشا وقىتاتىن كۋرستارعا ورنالاستىرىپ, ولارعا جۇمىس تاۋىپ بەرۋ ءۇشىن جۇمىسپەن قامتۋ جانە الەۋمەتتىك باعدارلامالار باسقارماسىمەن مەموراندۋمعا قول قويىلعان بولاتىن. سونىڭ ارقاسىندا 95 ادام جۇمىسپەن قامتاماسىز ەتىلىپ, ال
7 ادام ارنايى كۋرستان ءوتتى.
– ول ازاماتتاردىڭ جەكە كاسىپ اشۋىنا مۇمكىندىگى بار ما؟
– جۇمىسىمىزدىڭ قيىندىعى كوپ, دەسەك تە, ەكىنشى مارتە قاتەلىككە ۇرىنباي, اياققا تۇرعانداردى كورىپ, كوڭىلىمىز ورنىعادى. ماسەلەن, 3 جىل بۇرىن تۇرمەدەن بوساعان احمەد ۆاليەۆ ءبىزدىڭ قوعامدىق قوردىڭ سەپتەسۋىمەن كولىكتەردى تەحنيكالىق جوندەۋدەن وتكىزەتىن جەكە كاسىبىن اشتى. ول بۇل ىسكە بوستاندىقتان ايىرۋ ورنىندا ءجۇرىپ-اق ماشىقتانىپ العان. بۇگىنگى كۇنى جانىندا ءبىر كومەكشىسى بار. بولاشاقتا بيزنەسىن كەڭەيتىپ, كەم دەگەندە 10 ادامدى جۇمىسپەن قامتىعىسى كەلەدى. الايدا, ول ءۇشىن كەڭىرەك جەر ۋچاسكەسى كەرەك ەكەن. سوندا دا, ءوز وتباسى قامى ءۇشىن كۇنى-ءتۇنى ەڭبەكتەنۋدەن شارشامايدى. ەرتەڭگە دەگەن سەنىمى كۇشتى.
ءمادينا جاقىپ
