ادامنىڭ ار-وجدانعا كوپ كوڭىل بولمەي, تەك ءناپسىسىن كۇيتتەپ كەتۋى – ونى ءتۇرلى ازعىندىققا يتەرمەلەيدى. اتا-بابالارىمىز «ايداي اجارىڭدى يتتەي ءناپسى توزدىرادى» دەپتى. دىنىمىزدە پاراقورلىق, جەمقورلىق, دۇنيەقوڭىزدىق, زيناقورلىق سىندى ۇلكەن كۇنالاردىڭ قاتارىنا ناپسىقورلىقتى قوسا اتاۋى تەگىن ەمەس. ويتكەنى, ءناپسى ۇنەمى تەك قانا جاماندىقتى, تانقۇمارلىقتى قالاپ تۇرادى. قاسيەتتى قۇراننىڭ «يۋسۋف» سۇرەسىنىڭ 53-اياتىندا: «راسىندا, ءناپسى تەك قانا جاماندىقتى قالايدى» – دەپ كەلۋى, ءسوزىمىزدىڭ بىردەن-ءبىر دالەلى.
كەبەنباي اقىن بىلاي دەگەن ەكەن: «ءناپسى دەگەن پالە – ءدۇر, جانعان وتقا سالا – ءدۇر». ناسيحات, ناقىلداردىڭ بارلىعىنان ءبىز اتا-بابالارىمىزدىڭ سوناۋ ەرتە كەزدەن ءناپسىنىڭ جاماندىعىنان حالىقتى ساقتاندىرعانىن, ەل ىشىندە ناپسىقۇمارلىقتىڭ ءتۇبى جاقسىلىققا اپارمايتىندىعىن كەڭىنەن ۇگىتتەگەنىن بىلەمىز.
ءبىزدىڭ ەلدە جەمقورلىق جىلدان-جىلعا ءورشىپ كەلەدى. شاريعات پاراقورلىقتى قاتتى ايىپتايدى. ءابۋ-ھۋرايرا (ر.ا.) ريۋايات ەتكەن حاديستە پايعامبارىمىز (س.ا.س.): «پارانى العان دا, بەرگەن دە ادامعا جانە ونىڭ زاڭدارىنا اللانىڭ لاعىنەتى بولسىن» – دەگەن. يسلام عالىمدارى «ونىڭ زاڭدارى» دەگەندە دەلدالداردى ءتۇسىنۋىمىز كەرەك دەگەن توقتامعا كەلگەن. ابدوللا يبن وماردان جەتكەن حاديستە دە ءدال وسىلاي ايتىلادى. ال, يمام ءناۋاۋيدىڭ جيناعىندا: «پارانى الۋشى دا, بەرۋشى دە توزاق قاۋىمىندا» دەپ جازىلعان. «قاي حالىقتا تالان-تاراجدىق ورىن السا, ول قۇرعاقشىلىق پەن اشتىققا ۇشىرايدى, پاراقورلىق جايلاعان ەلدى ۇنەمى قورقىنىش بيلەيدى» دەگەن دە حاديس بار.
«باسشىنىڭ ەلىن ءبىر ساعات ءادىل باسقارۋى – ءبىر جىلدىق ءناپىل عيباداتقا تەڭ» دەيدى پايعامبارىمىز (س.ا.س.). الايدا, جاراتقاننىڭ بۇل مۇمكىندىگىن پايدالانۋدى كەيبىر باسشىلار ەسىنە دە العىسى كەلمەيدى.
ماعزۇم قاجى بالتابايۇلى
