جەمقورلىقتىڭ جولى كەسىلەدى
«نۇر وتان» پارتياسى استانا قالالىق فيليالىندا سىبايلاس جەمقورلىققا قارسى كۇرەستى كۇشەيتۋدەگى ىنتىماقتاستىق تۋرالى مەموراندۋمعا قول قويۋ ءراسىمى ءوتتى.
– سىبايلاس جەمقورلىق – مەملەكەتتىڭ تۇراقتىلىعى مەن قاۋىپسىزدىگىنە قاتەر ءتوندىرىپ, ەلىمىزدە اتقارىلىپ جاتقان ەكونوميكالىق جانە الەۋمەتتىك رەفورمالارعا كەدەرگى كەلتىرەتىن قوعامدىق دەرت. كوپتەگەن سالادا ورىن الىپ جاتقان جەمقورلىق ارەكەتتەر قازاقستان رەسپۋبليكاسىنىڭ ىشكى جاعدايىنا عانا ەمەس, ونىڭ حالىقارالىق بەدەلىنە دە نۇقسان كەلتىرەدى. كەز كەلگەن وركەنيەتتى قوعام ءۇشىن سىبايلاس جەمقورلىقپەن كۇرەس وزەكتى بولىپ تابىلادى. سول سەبەپتى دە مەملەكەتىمىزدىڭ ەكونوميكالىق جانە ساياسي تۇراقتىلىعىن ازاماتتاردىڭ قۇقىقتارى بوستاندىقتارىن قامتاماسىز ەتۋ ىسىنە بەلسەندى تۇردە ات سالىسۋىمىز قاجەت, – دەپ اتاپ ءوتتى «نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆ سالتاناتتى ءراسىم الدىندا سويلەگەن سوزىندە. ودان كەيىن «نۇر وتان» پارتياسى استانا قالالىق فيليالى ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىمەن, قارجىلىق باقىلاۋ ينسپەكتسياسىمەن, ۇلتتىق كاسىپكەرلەر پالاتاسىنىڭ قالالىق فيليالىمەن جانە حالىققا قىزمەت كورسەتۋ ورتالىعى استانالىق فيليالىمەن ىنتىماقتاستىق مەموراندۋمدارعا قول قويىلدى.
ايگۇل ۋايسوۆا