الداعى مامىر ايىندا ەلورداداعى مەملەكەت مەنشىگىندەگى 88 جەر تەلىمى باسساۋداعا شىعارىلماق. ونىڭ جاي-جاپسارىن استانا قالاسى جەر قاتىناستارى باسقارماسى باسشىسىنىڭ ورىنباسارى نازىمبەك كەنجەباەۆتان بىلگەن ەدىك.
– قاتەلەسپەسەك, ەلوردادا جەر تەلىمدەرىن باسساۋداعا شىعارۋ ءىسى ءبىرىنشى رەت قولعا الىنىپ وتىر. بۇعان نە سەبەپ بولدى؟
– اعىمداعى جىلدىڭ باسىندا قازاقستان رەسپۋبليكاسى جەر كودەكسىنىڭ 48-بابىنا وزگەرىستەر ەنگىزىلدى. سوعان سايكەس مەملەكەت مەنشىگىندەگى جانە پايدالانۋعا بەرىلمەگەن جەر تەلىمدەرىن باستاپقى كەزەڭدە يەلىككە بەرۋ قۇقىعىن ساۋدا-ساتتىققا شىعارۋ, سونىڭ ىشىندە كونكۋرستار, اۋكتسيوندار وتكىزۋ ارقىلى جۇزەگە اسىرىلادى. وسى شارت جەر تەلىمدەرىن جالعا باستاپقى كەزەڭدە بەرۋ ىسىنە دە قولدانىلادى. ءبىر اتاپ وتەر جايت, ءباسساۋدا ونى وتكىزۋدىڭ ءتيىستى ەرەجەسى زاڭدى كۇشىنە ەنگەننەن كەيىن عانا ىسكە اسىرىلادى. قازىرگى تاڭدا بۇل ەرەجە بەلگىلەنگەن تارتىپكە ساي ادىلەت ورگاندارىندا مەملەكەتتىك تىركەۋىن كۇتۋدە.
– باسساۋداعا شىعارىلاتىن جەر تەلىمدەرىن قانداي ماقساتتا پايدالانۋعا بولادى؟
– ۋاكىلەتتى ورگاندار باسساۋداعا شىعارىلاتىن ءارتۇرلى ماقساتتاعى جەر تەلىمدەرىن انىقتاپ, سولاردىڭ قاتارىندا ونەركاسىپتىك-ازاماتتىق ماقساتتاعى, جەدەل تاماقتانۋدىڭ ۋاقىتشا نىساندارىنا, تۇرعىن ءۇي سالۋعا جانە شاعىن جانە ورتا بيزنەسكە ارنالعان جەر تەلىمدەرىنىڭ العاشقى 88-ءىنىڭ ءتىزىمىن دايىندادى. ول جەر تەلىمدەرى استانانى دامىتۋدىڭ 2015-2017 جىلدارعا ارنالعان باس جوسپارىنا سايكەس قالانىڭ يگەرۋگە جاتاتىن اۋداندارىندا ورنالاسقان. جانە ولار ماگيسترالدىق ينجەنەرلىك جەلىلەرمەن قامتاماسىز ەتىلۋى ءتيىس.
– باسساۋداعا شىعارىلاتىن جەر تەلىمدەرى قالانىڭ ناقتى قانداي اۋداندارىندا ورنالاسقان؟ باستاپقى باعاسىن ايتا الاسىز با؟
– جەر تەلىمدەرى تۇران داڭعىلىندا, تەلمان جانە يلينكا تۇرعىن الاپتارىندا, سونداي-اق, كىرۋ ماگيسترالدارىنىڭ ماڭىندا جانە ەلوردانىڭ وزگە جەرلەرىندە ورنالاسقان. ماسەلەن, الاش تاس جولىنداعى اۋدانى 0,30 گا جەر تەلىمىنىڭ نىسانالى ماقساتى «جول ماڭىندا قىزمەت كورسەتۋ نىسانى» بولىپ سانالادى. ونى جوبالاۋ مەن سالۋدىڭ نورماتيۆتىك مەرزىمى – 18,2 اي نەمەسە 1,5 جىل. جەر تەلىمىنىڭ مەملەكەتتىك كاداسترلىق باعالاۋ قۇنى – 14 034 000 تەڭگە.
– باسساۋداعا قاتىسۋعا مۇددەلى ادامدار قانداي قۇجاتتار تاپسىرۋلارى قاجەت?
– بىرىنشىدەن, اۋكتسيونعا قاتىسۋعا ءوتىنىش جازادى. ودان كەيىن كەپىلدىك جارنا تولەمى تۋرالى قۇجاتتى, جەكە كۋالىگىن نەمەسە زاڭدى تۇلعالار مەملەكەتتىك تىركەلۋ تۋرالى كۋالىكتى, قاجەت بولعان جاعدايدا سەنىمحاتتى تاپسىرۋى قاجەت. سوندا ول باسساۋداعا قاتىسۋعا تىركەلە الادى.
اۋكتسيونعا قويىلاتىن جەر ۋچاسكەلەرىنىڭ سيپاتاماسىن www.saulet.astana.kz/news/17/ الۋعا بولادى.
امانعالي قالجانوۆ
