ۇستىمىزدەگى جىلدىڭ 1 شىلدەسىنەن باستاپ كەدەندىك وداق ەلدەرىنىڭ «جيھاز ونىمدەرىنىڭ قاۋىپسىزدىگى جونىندەگى» تر تس 025/2012 تەحنيكالىق رەگلامەنتى كۇشىنە ەنەدى. وسىعان وراي, كەشە ەلورداداعى جيھاز جاساۋشىلار مەن ساتۋشىلارعا ارنالعان سەمينار-كەڭەس ءوتتى. وندا يندۋستريا جانە جاڭا تەحنولوگيالار مينيسترلىگىنىڭ تەحنيكالىق رەتتەۋ جانە مەترولوگيا كوميتەتىنىڭ استانا قالاسى بويىنشا دەپارتامەنتى مەن استانا قالاسى تۇتىنۋشىلاردىڭ قۇقىعىن قورعاۋ دەپارتامەنتى ماماندارى قۇجاتتىڭ قىر-سىرىمەن تانىستىردى.
تەحنيكالىق رەگلامەنتتى رەسەيدىڭ ونەركاسىپ جانە ساۋدا مينيسترلىگى ازىرلەگەن. قازاقستاننىڭ يندۋستريا جانە جاڭا تەحنولوگيالار مينيسترلىگى اتالمىش ىسكە اتسالىسقان. وسى جۇمىستىڭ باسى-قاسىندا بولعان مينيسترلىكتىڭ ونەركاسىپ كوميتەتى قۇرىلىس يندۋسترياسى جانە اعاش وڭدەۋ ونەركاسىبى باسقارماسىنىڭ باس ساراپشىسى جانار جاناليەۆا بۇل قۇجات ارقىلى قاۋىپسىزدىك تالاپتارى قويىلعان جيھاز تۇرلەرىن اتادى. ونىڭ ايتۋىنشا, مەديتسينالىق, سونىمەن قاتار, جولاۋشىلاردى تاسىمالداۋ ماقساتتارىندا قولدانىلاتىن, سونداي-اق, انتيكۆارلىق, قولدانىستا بولىپ, جوندەۋدەن وتكەن جيھازداردان وزگە جيھاز تۇرلەرىنە تەحنيكالىق رەگلامەنت جۇرەدى. رەگلامەنتتە جيھازدىڭ بەرىكتىگى, بيىكتىگى, قاتتىلىعى-جۇمساقتاعى سەكىلدى تالاپتار بار. قۇرامىنداعى ءتۇرلى حيميالىق زاتتاردىڭ مولشەرى دە بەلگىلەنگەن. ماسەلەن, جيھازداعى اممياك مولشەرى – 0,04 مگ-نان, فورمالدەگيد – 0,01 مگ-نان, فەنول – 0,003 مگ-نان اسپاۋى ءتيىس.
بۇل زاتتاردىڭ مولشەردەن كوپ بولۋى ادام دەنساۋلىعىنا كىنارات اكەلۋى مۇمكىن. مۇنى ايتقان استانا قالاسى تۇتىنۋشىلاردىڭ قۇقىعىن قورعاۋ دەپارتامەنتىنىڭ ءبولىم باسشىسى الەكساندر كيم بەنزول مەن فەنولدىڭ مولشەردەن كوپتىگىنەن ادام ۋلانىپ, ورتالىق جۇيكە جۇيەسى زاقىمداناتىنىن, حيميالىق زاتتار اعزاعا بىرتە-بىرتە جينالىپ, قاتەرلى ىسىككە ۇرىندىراتىنىن جەتكىزدى. مۇندايدى بولدىرماۋ ءۇشىن جيھاز ءتيىستى زەرتحانالاردا تەكسەرىلۋى كەرەك ەكەن. سونداي-اق, ءار جيھازدىڭ سەرتيفيكاتى مەن پاسپورتى بولۋى شارت.
تۇتىنۋشىلاردىڭ قۇقىعىن قورعاۋ دەپارتامەنتى 2012 جىلدان بەرى جيھازداردىڭ قاۋىپسىزدىگىن تەكسەرىپ كەلەدى. اعىمداعى جىلدىڭ بەس ايىندا وسىنداي 48 تەكسەرىس ءوتىپ, تالاپقا ساي ەمەس جيھاز انىقتالماعان. الەكساندر كيم جاريالانعان موراتوريگە بايلانىستى ەندى تەكسەرۋ جۇرگىزىلمەيتىنىن, تەك شىن قاۋىپتى جاعدايدىڭ تۋىنداۋى عانا بۇعان نەگىز بەرەتىنىن ايتتى.
يندۋستريا جانە جاڭا تەحنولوگيالار مينيسترلىگىنىڭ تەحنيكالىق رەتتەۋ جانە مەترولوگيا كوميتەتىنىڭ استانا قالاسى بويىنشا دەپارتامەنتىنىڭ باس مامانى اقمارال قابىلوۆا جيھازدى ماركالاۋ تالاپتارىمەن تانىستىردى. «ەگەر جيھاز ماركالاۋ تالاپتارىنا ساي كەلمەسە, شاعىن بيزنەس وكىلدەرىنە – 50 اەك, ورتا بيزنەسكە – 100 اەك جانە ءىرى بيزنەسكە 200 اەك ايىپپۇل سالىنادى» دەدى ول.
امانعالي شميتۇلى
