جول ۋچاسكەلەرى جابىلدى

ەلىمىزدە اۋا رايى ناشارلاپ, قالا ماڭىندا بۇرقاسىن, جولدىڭ دۇرىس كورىنبەۋى, كوكتايعاق بولۋىنا بايلانىستى 106 جول ۋچاسكەسى جابىلدى, ونىڭ 41-ءى – رەسپۋبليكالىق جانە 69-ى – وبلىستىق ماڭىزى بار جولدار.

قر توتەنشە جاعدايلار مينيسترلىگى ءباسپاسوز قىزمەتىنىڭ حابارلاۋىنشا, جولداعى توتەنشە جاعدايلاردى جويۋ جونىندەگى رەسپۋبليكالىق شتاب قۇرىلدى, وسىنداي شتابتار وڭىرلەردە دە جۇمىس ىستەيدى.

باقىلاۋ بەكەتتەرىندە 600 كولىك جينالىپ قالعان.

تاۋلىك ىشىندە قۇتقارۋ بولىمشەلەرى 695 ادامدى قۇتقارىپ, ەۆاكۋاتسيالادى. سونىڭ ىشىندە جامبىل, تۇركىستان, قوستاناي, قاراعاندى جانە اباي وبلىستارىنان 137 بالا بار, 146 تەحنيكا قار قۇرساۋىنان شىعارىلدى.

تۇرعىنداردى ەۆاكۋاتسيالاۋ ءۇشىن جولداردىڭ جابىق ۋچاسكەلەرىندە 846 ۋاقىتشا جىلىتۋ پۋنكتى ۇيىمداستىرىلعان, سونىمەن قاتار 99 تەحنيكا (ۆاحتوۆكا جانە كۋنگ) دايىن تۇر.

ۋاقىتشا جىلىتۋ ورىندارىندا 171 ادام بولسا, ونىڭ ىشىندە 4-ەۋى –جامبىل, اباي, اقمولا, قوستاناي, پاۆلودار وبلىسىنا قاراستى بالا.

تۇرعىنداردى ەسكەرتۋ ماقساتىندا اۋا رايىنىڭ قولايسىزدىعى تۋرالى 232 سمس حابارلاما, «دارمەن» ءموبيلدى قوسىمشاسى ارقىلى 71 حابارلاما جىبەرىلگەن.

قۇتقارۋ جۇمىستارىنا بارلىعى 1000-نان اسا ادام مەن توتەنشە جاعدايلار مينيسترلىگى, جەرگىلىكتى اتقارۋشى ورگانداردىڭ جانە ىشكى ىستەر مينيسترلىگىنىڭ 600-گە جۋىق تەحنيكا بىرلىگى جۇمىلدىرىلعان.

جول قىزمەتى جولدى تازارتۋ جۇمىستارىن جالعاس­تىرۋدا