«حان شاتىر» ساۋدا-ويىن-ساۋىق ورتالىعىنىڭ وڭ قاپتالىنداعى ات شاپتىرىم اۋماقتا ورىن تەپكەن «مىڭجىلدىقتار توعىسىنداعى استانا» كوشپەندىلەر وركەنيەتى فەستيۆالىنىڭ اياسىندا «جۇيەلى ءسوز» اتاۋىمەن ايتىس ءوتتى. ەلىمىزدىڭ ءار ايماعىنان «ءسوز بارىمتاسىنا» جينالعان جاس ايتىسكەر اقىنداردىڭ ورتاسىنان دارا شىققان ورال قالاسىنىڭ ۇكىلەگەن ءۇمىتى باۋىرجان شيمەردەنۇلى توپ جارىپ, باس جۇلدە – 1 ميلليون تەڭگەنى يەلەندى.
اقىندار ەكى كۇن بويى ءسوز جارىستىردى. وتكەن عاسىردىڭ سەكسەنىنشى جىلدارىنان بەرى ايتىس ونەرىن ورگە سۇيرەگەن بەلگىلى اقىن ءجۇرسىن ەرمان باستاعان قازىلار القاسىنىڭ قۇرامىندا الاشتانۋشى عالىم, فيلولوگيا عىلىمىنىڭ دوكتورى ديحان قامزابەكۇلى, ايتىسكەر اقىنداردىڭ اعا بۋىنىنا اينالعان ءانۋار ومار, داۋلەتكەرەي كاپۇلى, فيلولوگيا عىلىمىنىڭ كانديداتى نۇرلان اسقاروۆ بولدى.
وسى قازىلاردىڭ ۇيعارىمىمەن قورىتىندى ءۇشىنشى اينالىمعا ءتورت اقىن جىبەرىلدى. اتاپ ايتساق, فينالدا اقتوبەلىك ەرشات قايبولدين ورالدىق باۋىرجان شيمەردەنۇلىمەن ءسوز قاعىستىردى. ال قىزىلوردالىق ەرجان ءامىروۆ شىمكەنتتىك داۋرەن اقساقالوۆپەن ايتىستى.
العاشقى جۇپتىڭ ايتىسى ماندىرەك, سالماقتىراق بولعانىن ايتا كەتەيىك. اسىرەسە, ەرشاتتىڭ «تاڭىردەن ەندى تىلەرىم بولماڭدار تاعى تاۋەلدى», استانانى مەڭزەگەن «شاڭىراققا كەنجە ۇل يە بولادى» دەگەن ولەڭ جولدارى كوڭىلىمىزگە ۇنادى. وسى ەكى اقىن جىگىت تەڭ ءتۇستى دەپ ايتۋعا بولادى. قازىلاردىڭ بەرگەن باعاسى دا سونىڭ انىق كورىنىسىندەي بولعان. الايدا, باۋىرجاننىڭ باعى باسىمداۋ بولىپ, ول باس جۇلدەنى يەلەندى. ال ەرشات ءبىرىنشى ورىندى قاناعات تۇتتى.
ەرجان ءامىروۆ پەن داۋرەن اقساقالوۆقا ەكىنشى ورىن بۇيىردى. ال ءۇشىنشى ورىن جۇلدەسى ءتورت اقىنعا بەرىلدى. ونى استانالىق ارۋنا كەرىمبەك, اقتوبەلىك مارات احمەتوۆ, الماتىلىق اياۋلىم جۇمابەك جانە تۇركىستاندىق تۇرار تىلەۋليەۆ سىندى جاس اقىندار الدى. سونداي-اق, استانالىق سايات ابەنوۆ پەن موڭعولياداعى قانداسىمىز ەرلان داۋلەتكە ارنايى سىيلىقتار تاپسىرىلدى. اتالمىش ايتىستى «ەل» پروديۋسەرلىك ورتالىعى توعىزىنشى مارتە ۇيىمداستىرعانىن ايتا كەتەيىك.
ال ەلوردادا ءتورت كۇن بويى دۇرىلدەگەن «مىڭجىلدىقتار توعىسىنداعى استانا» كوشپەندىلەر وركەنيەتى فەستيۆالى بۇگىن قورىتىندىلانادى. فەستيۆالدىڭ سوڭعى كۇنى كورەرمەن وتكەن جەكسەنبىدەن سارسەنبىگە دەيىن تاماشالاپ ۇلگەرگەن ۇيرەنشىكتى شارالارمەن قاتار ساۋلە جانپەيىسوۆا مەن ەرلان رىسقاليدىڭ «قوس القا» اتتى كونتسەرتى ءوتتى. سونداي-اق, «داۋىلپاز» اتاۋىمەن «حاسساق» جانە «سارىارقا» ەتنو-فولكلورلىق انسامبلدەرىنىڭ كۇي شاشۋى, «قوڭىراۋلى نايزا» اتىمەن قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان ءان-جىر كەشى, «استانا-ارقاۋ» ءداستۇرلى تۇركى مۋزىكاسى فەستيۆالىنىڭ جابىلۋى كەشكى باعدارلامادا تۇر. فەستيۆال «توي تارقار» شاراسىمەن تۇيىندەلەدى.
امانعالي قالجانوۆ
