ەرتەڭ كەمباعال بالالاردىڭ اراسىنان تۋما تالانتتارىن تاۋىپ, بۋىرقانعان بۇلاقتاردىڭ كوزىن اشاتىن «جۇلدىزاي» بايقاۋىنىڭ گالا كونتسەرتى وتەدى. بۇل ءىس-شارا بيىل توعىزىنشى مارتە ۇيىمداستىرىلىپ وتىر.
بايقاۋ بارىسىندا ۇيىمداستىرۋشىلار قازاقستاننىڭ ون التى قالاسىنا بارىپ, ونەرلى ورەندەردى ىرىكتەپ العان بولاتىن. سايىسقا قاتىسۋعا بەس مىڭعا جۋىق ۇمىتكەر نيەت ءبىلدىردى. ولاردىڭ 300-ءى عانا اقتىق سىنعا جولداما الدى. جارىمجان بولىپ جاراتىلسا دا, ءبارىنىڭ بويىندا تاس جاراتىن تالانتى بار. ءبىرى بي بيلەپ, ءان سالسا, ەندى ءبىرى مۋزىكالىق اسپاپتا ويناپ, ىممەن ولەڭ ايتادى. بۇدان وزگە قولونەردى جانى سۇيەتىن جاس شەبەرلەر ءوز تۋىندىلارىن كوپشىلىككە كورسەتكەن بولاتىن. ونەر بايقاۋى مۇگەدەك بالالاردىڭ ومىرگە قۇشتارلىعىن وياتىپ قانا قويماي, شىعارماشىلىقتارىنىڭ شىڭدالۋىنا سەرپىن بەرەدى.
«بۇل بالالار كەيدە ساۋ ادامنىڭ قولىنان كەلمەيتىن تىرلىكتى ىستەيدى. ءىس-قيمىلمەن كورسەتىلەتىن اندەردى تاماشا ورىندايدى. ويتكەنى ءاننىڭ ماعىناسىن تىڭداۋ ءبىر بولەك نارسە, كورىپ قابىلداۋ مۇلدە باسقا. ولار ءان ايتىپ تۇرعاندا كوزىنە جاس المايتىن ادام جوق شىعار. ومىرگە دەگەن قۇش-تارلىعىن كورگەن كەزدە, ءسۇيسىنەسىڭ» دەيدى فەستيۆالدىڭ قويۋشى-رەجيسسەرى باقىتجان ءتاجينوۆ.
ەرتەڭ بولاتىن كونتسەرتتە بالالار ەلىمىزگە تانىمال انشىلەرمەن بىرگە ساحناعا شىعادى. وندا بايگەگە قاتىسۋشى جەتكىنشەكتەردىڭ ءومىرى باياندالىپ وتىرادى. وعان قوسا, قىتايدان Hand in Hand دۋەتى كەلەدى ەكەن. توپ قۇرامىندا اۆتوكولىك اپاتىندا قولىنان ايىرىلعان بالەرينا ما لي, كىشكەنتاي كەزىندە تراكتوردىڭ مەحانيزمىنە ءتۇسىپ اياعىنان ايىرىلعان چجاي سياوۆەي بار. مۋزىكانتتار بالالارعا ءوز ءومىرلەرى جانە قيىندىقپەن كۇرەسۋ تۋرالى ايتىپ بەرەدى. سونداي-اق, بالالارعا شەبەرلىك ساباقتارى وتكىزىلەدى. سول ارقىلى ولاردى مودەرن-بالەت, ۆوكال, وپەراتورلىق جۇمىس جانە مونتاجداۋعا ۇيرەتپەك. ءىس-شارا سوڭى ساياحاتقا ۇلاسادى. دارىندى جەتكىنشەكتەر استانانى ارالاپ, تاماشالايدى.
ەركەجان ساتىمبەك
