كەيبىر عالىمدار جۋرناليست ەڭبەگىنىڭ اۋىرلىعىن جەتى قابات جەر استىندا كومىر قازۋمەن تەڭەستىرەدى. ولاردىڭ مۇنىسىن قيسىنسىز تەڭەۋ دەۋگە كەلمەيدى. كۇيىپ تۇرعان وقيعانىڭ باسى-قاسىندا ءجۇرىپ, قايناعان تىرشىلىكتىڭ قاق ورتاسىنان «كەن قازۋ» – شىنىمەن دە ءجۋرناليستىڭ باستى قىزمەتى.
ماماندىقتىڭ قويار تالابى سول بولعاندىقتان, ولاردىڭ ەڭبەگى سەگىز ساعاتتىق جۇمىس كۇنىمەن شەكتەلمەيتىنى انىق. ادەتتە باسقا ادامدار بار جۇمىسىن كەشكى التىدان سوڭ كەڭسەدە قالدىرىپ كەتسە, جۋرناليستەردە ونداي جەڭىلدىك جوق. ونىڭ موينىنداعى جۇك وزىنەن ءبىر ەلى قالماي, ۇيىنە ەرىپ كەلەدى. تاماعىن ىشسە دە, تويعا بارسا دا, ۇيىقتاسا دا – قىسقاسى, جەكە باسىنا بولەتىن ۋاقىتىنىڭ كوبىن الگى جۇگىنە تاعى ارنايدى. ياعني ەرتەڭگى ماقالاسىنىڭ, تەلەباعدارلاماسىنىڭ نە راديوحابارىنىڭ باعدارىن باجايلاپ, جوسپارىن قورىتىپ جۇرەدى.
ولاردىڭ وسىنداي ەرەن ەڭبەكتەرى ەسكەرىلىپ جاتسا, قانداي عانيبەت؟! جۋىردا ءبىزدىڭ «استان اقشامى» گازەتىنىڭ قوس ءتىلشىسى رەسپۋبليكالىق بايقاۋدىڭ جۇلدەگەرلەرى اتانعاندا, كول-كوسىر قۋانىشقا كەنەلگەنىمىز دە سوندىقتان. اتاپ ايتساق, تاجىريبەلى ارىپتەسىمىز ايگۇل ۋايسوۆا دەنساۋلىق ساقتاۋ سالاسى جايلى جازعان ۇزدىك ماقالالارى ءۇشىن «التىن شيپاگەر» سىيلىعىن قانجىعاسىنا بايلاپ, 1 ميلليون تەڭگەلىك ماراپاتقا يە بولدى. ودان بولەك, شولۋشىمىز ازامات ەسەنجول قازاق تىلىنە قاتىستى وزەكتى ماسەلەلەردى كوتەرىپ, ولاردى ەلگە تانىتۋدا ەڭبەك سىڭىرگەنى ءۇشىن «مەملەكەتتىك ءتىل جانە باق» رەسپۋبليكالىق بايقاۋىندا ءىىى ورىندى ولجالادى. سونداي-اق ءبىزدى ۇنەمى پارلامەنتتەگى وقيعالاردان حاباردار قىلىپ وتىراتىن گازەتىمىزدىڭ شەف-رەداكتورى تولەن تىلەۋباي ءدال جۋرناليستەر كۇنىندە قر پارلامەنت ءماجىلىسىنىڭ «پارلامەنت ءسوزى» سىيلىعىن ەنشىلەدى.
اقشامدىقتاردى ايتۋلى جۇلدەلەرىمەن تاعى دا قۇتتىقتاي وتىرىپ, جاقسى جاڭالىقتاردىڭ جارشىسى بولا بەرۋلەرىن تىلەيمىز.
