Елорда күні астаналықтар үрмелі аспаптар оркестрлерінің «Астана самалы» халықаралық фестивалін тамашалады. Қала әкімдігі ұйымдастырған шарада Мемлекеттік академиялық филармония, ҚР Ұлттық ұланы, Шығыс Қазақстан облыстық филармониясы, Тагилдың «Тагил-BEND» және Ресейдің үрмелі аспаптар оркестрлері өз өнерлерін ортаға салады.
«Астана самалы» фестивалі жыл сайын өтетін дәстүрлі шараға айналған. Биылғы кеште отандық және шетелдік өнер ұжымдары қызықты бағдарламаларын ұсынды. Яғни, фестиваль мақсаты – халықтың мерекелік көңіл-күйін көтеруді көздеді.
Фестивальдің арнайы қонағы – 1976 жылы ежелгі жалаумен ойнау өнерін жандандыру мақсатында құрылған Storici Sbandieratori delle Contrade di Cori фольклорлық тобы. Бұл топ қайта өрлеу дәуірінің керемет костюмдерін киіп, өткен заманның ғажайып жай-күйін көз алдымызға әкелді. Трубаның таза дыбысы, дауылпаздардың ырғақты дабылы, орындаушылықтың ойнақылығы көрермендерді таң қалдырып, шаттыққа бөледі.
Қалалық алаңда басталған мерекелік шара «Бәйтерек» монументі алдында бэнд-марафонға ұласты. Шерудің соңғы күнінде өнерпаздар Әскери-тарихи музейден бастап, Республика даңғылының бойымен «Жастар» сарайына дейін жүріп өтті.
– «Астана самалы» – бұл музыкалық шоу. Әлемнің көптеген елдеріндегі үрмелі аспаптар шеберлерінің басын бір сахна аясына жиятын жыл сайынғы дәстүрлі шара. Дәстүрлі болатын себебі, бұл фестиваль осымен бірнеше мәрте ұйымдастырылып отыр. Биыл халықаралық шараға бірнеше үрмелі аспаптар оркестрлерінің ұжымдары келді. Әр түрлі аспапта шебер ойнайтын өнер ұжымдарының концертіне жиналған қауымның көңілінен шықты, – дейді ұйымдастырушылар.
Гүлмира ШАРХАНҚЫЗЫ
