АҚТӨБЕ ОБЛЫСЫ
«Бизнестің жол картасы-2020» бағдарламасы бойынша былтыр облыс бойынша 400-ге жуық жоба қолдау тапқан. Барлығы 1500 кәсіпкерге 24 млрд теңгеге қаржылай көмек берілген.
ШЫҒЫС ҚАЗАҚСТАН ОБЛЫСЫ
Өскемендік бағбан Вячеслав Камчатный алып асқабақ өсірді. Көрген жұрттың таңдайын қақтырған өнімнің биіктігі – 40 см, жалпақтығы – 80 см. Енді ерекше өнім асқабақтар фестиваліне қойылады.
ҚАРАҒАНДЫ ОБЛЫСЫ
Қарағандының колледждері мен жоғары сынып оқушыларына қазақ тіліне аударылған 100 оқулық таратылды. Игілікті іс «Жаңа гуманитарлық білім. Қазақ тіліндегі 100 жаңа оқулық» атты республикалық жобаның шеңберінде жүзеге асырылды.
ЖАМБЫЛ ОБЛЫСЫ
Жамбылдық мұғалімдер асық ойынының жаңа түрін ойлап тапты. Инновациялық ойын «Үшбас» деп аталады. Ойынның кейбір тұсы тастаяқ пен футболдың элементтеріне ұқсағанымен, бірақ асықпен ойналады.
АТЫРАУ ОБЛЫСЫ
Атырау қаласы өзінің 378 жылдығын атап өтті. Қала күні мерекесіне орай ұзындығы 10 метрлік, ені 80 метрлік торт дайындалды. Сол күні «Нұрсая» ықшам ауданында 800 орындық жаңа аквапарктің ашылу рәсімі өтті.
ҚОСТАНАЙ ОБЛЫСЫ
Облыста 7 ауылдың атауы өзгерді. Сонымен қатар, 73 көшенің атаулары да жаңартылды. Мысалы, Қостанай қаласындағы Авиационная көшесі Кәмшат Дөненбаева, Затабол кентін Тобыл деп өзгерту жөніндегі ұсынысты да көпшілік қолдады. Жуырда ғана Таран ауданын Бейімбет Майлиннің атымен атау туралы ұсыныс та қолдау тапқан еді.
ТҮРКІСТАН ОБЛЫСЫ
Жапондық кәсіпкерлер Түркістанның инфрақұрылымына инвестиция салуға қызығушылық танытты. Жапондық компания биік үйлерді, су құбырларын және канализация желілерін салуға қатысуды жоспарлап отыр.
