БАЛА ШЫҒАРМАШЫЛЫҒЫН БАЙЫТТЫ
«Астана Арена» стадионы алаңында балаларға арналған қайырымдылық шарасы өтті. Психологтар мен арт-терапевтер балалар үйінің тәрбиеленушілеріне арнап коммуникативтік дағдыларды дамытуға және өз-өзіне деген сенімді арттыруға бағытталған түрлі ойындар ұйымдастырды.
Акция бағдарламасын тәжірибелі мамандар әзірлеген. Арт-терапияның түрлі әдістері балалардың шығармашылық әлеуетін ашуға, ойлау қабілеттілігі мен қажетті әлеуметтік машықтарын дамытуға мүмкіндік берді.
– Мұндай қайырымдылық шарасы елордада алғаш рет өткізіліп отыр. Акцияның мақсаты – ойын, іс-қимыл және елес-қиял арқылы баланың шығармашылығын шыңдау. Бұл өз кезегінде балаларды әлеуметтік бейімдеуге және өз бетінше өмір сүруге үйретеді, – дейді «Best for Kids» қоғамдық қорының президенті Сая Кәкім.
Айта кетейік, шараға астаналықтар ғана емес, Ақмола облысының балалары да қатысты.