Бюджет қаржысы бақылаусыз қалмайды
Еліміздің Бюджет кодексінің нормаларына сәйкес мектепалды даярлық мекемелерін аудандардың әкімдіктері қаржыландырады. Қалалық мәслихат депутаттары Ұлттық экономика министрлігіне аталмыш кодекске өзгертулер енгізу туралы, яғни қаржыландыруды аудан әкімдіктерінен алып, Білім басқармасына беру ұсынысымен шықпақ. Депутаттардың пікірінше, бұл жағдай бюджет қаржысының игерілуін бақылауды күшейтеді. Бұл туралы өткен жылдың бюджетінің орындалуына арналған мәслихаттың әлеуметтік-мәдени даму мәселелері жөніндегі, сондай-ақ, экономика, өнеркәсіп және кәсіпкерлік мәселелері жөніндегі тұрақты комиссияларының бірлескен отырысында айтылды.
Мәслихат депутаты Қарақат Әбденнің сөзінше, былтыр мектепалды білімді қамтамасыз етуге көп қаржы бөлінген. Бағдарламаның әкімшісі аудандардың әкімдіктері болғанмен, бақылау шаралары мен мәліметтердің электронды базасына Білім басқармасы жауапты. Осы жағдайда аудан әкімдіктері бюджет қаржысын игерілу, игерілмеуін қалай тексеретіні түсініксіз. «Мәліметтер базасын аудан әкімдіктеріне немесе қаржыландыруды басқармаға беруді ұсынамын» деді депутат.
Тексеру комиссиясының төрағасы Ғалымжан Молдаш депутаттың ұсынысын қолдады. Оның айтуынша, бұл – бұрыннан шешілмей келе жатқан түйткіл. Мектепалды даярлық мекемелерін қаржыландыруды басқарма атқаруы тиіс. Олай болмаған соң, балабақшалар басқарма мен аудан әкімдіктеріне екі рет бірдей есепті тапсырады. Негізінен, аудан әкімдіктері шаруашылық мәселелерімен айналысқаны дұрыс еді. Бұл комиссия аталмыш мәселе бойынша Ұлттық экономика және Білім және ғылым министрліктеріне тиісті ұсыныспен шыққан екен, алайда олардың жауаптарында Бюджет кодексіндегі нормаға сілтеме жасалған.
Мәслихат депутаттары Астанада жылдан-жылға балаларды мектепалды мекемелермен қамту көрсеткіші өсіп жатқанын, әрине, қаржыландыру да ұлғаятынын атап өтіп, бұл жағдайда қаржының жұмсалуы бақылаусыз кету мүмкіндігін жеткізді. Депутат Мирас Шекенов Бюджет кодексіне тиісті өзгертулерді енгізу үшін әкімдік пен мәслихат жағынан тікелей Үкіметке шығуды ұсынды. Оның пікірінше, қазір заңдарға өзгерістер мен толықтырулар көп енгізілуде. Сондықтан заңдық тұрғыдан осыны шешуге болады.
Білім басқармасы тиісті ұсыныстармен жоғары жаққа шыққан екен. Алайда әзірге еш нәтиже жоқ. Басқарма өкілі аудан әкімдіктері ішінен білім бөлімдері құрылғанын, онда мектепалды білімнің жайы кезең-кезеңімен сараланатынын жеткізді.