ДенсаулықЖаңалықтар

Екпе салдыратындар  контингенті кеңейеді

Премьер-министрдің орынбасары Ералы Тоғжановтың төрағалығымен ел аумағында COVID-19 инфекциясының таралуына жол бермеу жөніндегі ведомствоаралық комиссияның (ВАК) отырысы өтті. Денсаулық сақтау министрі Алексей Цой елдегі санитариялық-эпидемиологиялық жағдай туралы баяндама жасады. Соңғы екі аптада коронавирусқа шалдығу деңгейі 30%-ға, өлім-жітім 40%-ға төмендеді.

[smartslider3 slider=279]

ВАК отырысында мынадай бірқатар маңызды шешім қабылданды: COVID-19-ға қарсы ұжымдық иммунитетті қалыптастыру мақсатында екпе салуға жататын контингент 9,9 млн-нан 11,4 млн адамға дейін ұлғайтылды, бұл ДДСҰ ұсынымдарына сәйкес ұжымдық иммунитетке 60% деңгейінде қол жеткізуге мүмкіндік береді; халықты қайта вакцинациялауды биыл қарашаның үшінші онкүндігінен мынадай санаттағы адамдар үшін бастау жоспарланып отыр: тәуекел топтары (медицина қызметкерлері, педагогтер, медициналық-әлеуметтік мекемелер мен жабық мекемелердің персоналы мен контингенті, күш құрылымдарының қызметкерлері); 60 жастан асқан адамдар; өздігінен зерттеулерден өткен және індетке қарсы антиденелерге теріс тест нәтижесі бар адамдар.
Сондай-ақ «Ashyq» жобасына қатысатын кәсіпкерлік нысандарының жұмыс уақыты: «жасыл» аймақта – сағат 03:00-ге дейін, «Ashyq» жобасының көшбасшылары үшін – сағат 05:00-ге дейін; «сары» аймақта – сағат 01:00-ге дейін, «Ashyq» жобасының көшбасшылары үшін – сағат 03:00-ге дейін ұзартылды. Үндістан және Филиппинмен өзара вакциналау төлқұжатын тану іске асырылды, нәтижесінде Қазақстан Республикасы 15 елмен вакциналау паспортын тану туралы келісімге қол жеткізді (Түркия, Венгрия, Грузия, Қырғызстан, Молдова Республикасы, Моңғолия, Таиланд, Беларусь Республикасы, Армения, Иран, Сан-Марино, Аргентина, Эстония, Үндістан мен Филиппин). Карантиндік шектеулер кезеңінде Қазақстан Республикасының мемлекеттік шекарасын кесіп өту тәртібіне ел аумағына еркін кіру (ВАК шешімінсіз) бөлігінде өзгерістер енгізілді: туыстық фактісін растай отырып, ҚР азаматтарының туыстары болып табылатын шетелдіктерге; ҚР азаматтарының отбасы мүшелері болып табылатын шетелдіктерге ауыр науқастанғандарға күтім жасау үшін, олардың ілесіп жүретін жұбайлары мен кәмелетке толмаған балаларына, сондай-ақ жерлеу рәсіміне келгендерге рұқсат етіледі. Ведомствоаралық комиссияның отырысын қорытындылай келе, Ералы Тоғжанов бірқатар нақты тапсырма беріп, ВАК қатысушыларының алдында таяу уақыттағы басым міндеттерді белгіледі.
 

Тағыда

Ұқсас жаңалықтар

Пікір үстеу

Back to top button