Мемлекеттік қызмет істері және сыбайлас жемқорлыққа қарсы іс-қимыл Агенттігінің Астана қаласы бойынша департаменті елордалық мемлекеттік қызметшілер мен кәсіби пікірсайысшы студенттер арасында «Қазақстан бүгін және болашақта» тақырыбында өңірлік турнир өткізді.
Пікірталасқа 44 команда қатысты. Нәтижесінде Астана қаласы әкімдігінің қызметкері Ержан Еңсебай мен Еуразия ұлттық университетінің студенті Жазира Өмірзақ басым болып, республикалық додаға жолдама алған болатын.
Агенттік жақында «Парасаттылық және заң үстемдігі – ұлттың табысты болуының кепілі» атты әкімшілік-мемлекеттік қызметшілер және студенттер арасында республикалық пікірсайыс турнирін өткізді. Оның финалына Қазақстан Республикасы Президентінің жанындағы Мемлекеттік басқару академиясының ректоры Фатима Жақыпова, Мемлекеттік қызмет істері және сыбайлас жемқорлыққа қарсы іс-қимыл Агенттігінің аппарат басшысы Саян Ахметжанов және белгілі қоғам қайраткерлері төрелік етті.
Екі күнге созылған пікірсайыста «DARABOZ» атымен өнер көрсеткен елордалықтар жеңімпаз атанды. «Астана Дарыны-2017» жастар сыйлығының «Үздік мемлекеттік қызметші» аталымы бойынша жеңімпазы Ержан Еңсебай мен «Оратор» дебат клубының мүшесі Жазира Өмірзақ жеңістерін Астананың 20 жылдық мерейтойына арнады.
