22-29 қараша күндері елордамыздағы «Дәулет» спорт кешенінде бокстан Қазақстан чемпионаты өтеді. Биылғы біріншіліктің басты ерекшелігі – АИБА-ның (Халықаралық бокс федерациялары қауымдастығы) жаңа ережелері іске қосылады. Атап айтқанда, енді боксшылар жекпе-жекке бұрын қорғаныш ретінде қолданып келген шлемсіз шығатын болады, сонымен қатар жаңа төрешілік жүйе енгізілмек.
Жалпы АИБА-ның жаңа ережелері халықаралық жарыстарға 2013 жылдан бастап іске қосылатыны жоспарланған. Ал оның алғашқы тәжірибесін сынап көруді АИБА басшылығы Қазақстан бокс федерациясына сеніп тапсырған екен. Сондықтан да биылғы ел чемпионаты жаңа ережелермен өтетін болып отыр. Ұлттық чемпионаттың ерекшеліктері туралы Қазақстан бокс федерациясының вице-президенттері Серік Қонақбаев пен Юрий Цхай арнайы өткізілген баспасөз мәслихатында егжей-тегжейлі баяндап берді.
– Шаршы алаңдағы жекпе-жектерді шлемсіз өткізу жөнінде ұсынысты Қазақстан бокс федерациясының басшысы Тимур Құлыбаев көтерген болатын. Мен осы бастаманы биыл Бангкокта өткен АИБА-ның атқару комитетінде күн тәртібіне енгізуді сұрап, айтулы мәселе жан-жақты талқыланып, бірауыздан қолдауға ие болған. Енді АИБА басшылығы жаңа ереженің қолданылуын бізге, яғни, Қазақстанға тапсырып отыр. Бұл үлкен сенім, үлкен жауапкершілік деп ойлаймын. Ал, шындап келсек, шлемсіз бокс әлдеқайда әсерлі болатыны сөзсіз. Боксшылар шлемге сенетін «жабық» боксты тоқтататын болады. Енді техникалық-тактикалық қорғанысқа, жалпы ойлап жұдырықтасуға жол ашылады. Мұндай бокс жанкүйерге де ұнайтынын өз басымнан өткен тәжірибеден білемін, – деп атап өтті қазақтың даңқты боксшысы Серік Қонақбаев.
Жаңа ережені қолданысқа енгізетін Қазақстан чемпионатына АИБА президенті Чинг-Куо Ву және басқа елдердің ұлттық федерациялары басшылары қатысады деп күтілуде. Чемпионат қарсаңында АИБА мамандары жаңа ережелердің қолданысқа енгізілуіне байланысты қазақстандық төрешілерге арналған семинар өткізетін болып отыр.
Ал, енді чемпионаттың өз барысына келер болсақ, Қазақстан чемпионы атағы үшін 10 салмақ бойынша 180-нен астам боксшы шаршы алаңға шығатын болып отыр. Лондон олимпиадасында жүлдегер атанған Серік Сәпиев, Әділбек Ниязымбетов және Иван Дычко ұлттық құрама басшылығының шешімімен бұл чемпионатқа қатыспайды. Естеріңізге сала кетсек, 2011 жылғы ел чемпионатында командалық бірінші орынды Астана қаласының құрамасы жеңіп алған болатын.
Сонымен, ұлттық спортымызға баланған бокстың керемет көріністеріне куә болатын байрақты жарыстың дүбірі жақындап қалды. Осы жарыстың қорытындысы бойынша Қазақстан ұлттық құрамасының негізі жасақталып, 2013 жылы Алматы қаласында өтетін әлем чемпионатында ел намысын қорғайтын жігіттер айқындалмақ.
Бокс тақырыбына тағы бір қосарымыз, Қазақстан бокс федерациясының Кубогы үшін өтіп жатқан жарыстың жартылай финалына шыққан командалар белгілі болды. Көкшетау қаласында Ақмола және Маңғыстау облыстарының құрамалары, Шымкент қаласында Оңтүстік Қазақстан және Алматы облыстарының құрамалары өзара кездесетін болады. Жартылай финалдық жекпе-жектер 7 желтоқсан күні өтсе, финал 15 желтоқсан күні Астанада өтеді. Естеріңізге сала кетсек, алғашқы 2010 жылғы өткен Қазақстан бокс федерациясының Кубогын Астана қаласының құрамасы, ал 2011 жылы Қарағанды облысының құрамасы жеңіп алған болатын.
Ғалым ҚОЖАБЕКОВ
