Еңбегі ерен жауынгер
Адам өміріне араша түсіп, жалындаған тілсіз жаумен күресте төтенше жағдайлар қызметкерлерінің еңбегі ерен. Құтқарушылардың қызметі қашан да қауіп-қатерге толы. Соған қарамастан адал еңбек иелері күн сайын тосыннан туындайтын қызыл жалынмен бетпе-бет келіп, тілсіз жаудың «тілін табуға» тырысады. Нағыз ер-азаматтарға, жүректілерге ғана тән мамандықты таңдағандардың бірегейі – Ернар ИСКАКОВ. Ол 2013 жылдың қараша айынан бастап Нұр-Сұлтан қалалық ТЖД мамандандырылған өрт сөндіру бөлімінде аға инженер болып жұмыс істейді.
«Өрт сөндіруші болуды бала кезімнен армандадым. Мен бұл мамандықты адамдарға көмектесу, жақсылық жасау үшін таңдадым. Өрт сөндіруші жан-жақты болуы керек. Спортшы әрі өз ісінің шебері болуы керек. Бұл мамандық үлкен жауапкершілікті қажет етеді. Жауынгерлік кезекшілік таңғы 8-ден басталады. 8:15-те саптық түзеу жүргізіледі, содан кейін өрт техникасын қабылдау, құжаттарды қабылдау ісі жүргізіледі. Сабақтар 9:30-дан 12:00-ге дейін өткізіледі. 12:00-ден 13:00-ге дейін нормативтік жаттығулар орындалады. Өрт сөндірушінің толық киімі жауынгерлік киім мен «draegen» тыныс алу аппаратынан тұрады. Біз түтіннен қорғану үшін осы аппаратты киеміз. Өрт кезінде денесін күйік шалып немесе о дүниелік болған жандарды көзбен көру өте қиын. Мүлік, құжаттарынан айырылу оның алдында түк емес. Елде жүректі ауыртар оқыс оқиғалар болмаса деп тілеймін» дейді Е.Искаков.