Бірлік күні Есіл бойында елордалық балалар мен жасөспірімдерге арналған мерекелік жүгіру ұйымдастырылды.
Мәдениет және спорт басқармасына қарасты спорттық-бұқаралық іс-шараларды өткізу жөніндегі дирекцияның мәліметінше, жүгіру жарысына 300-дей жеткіншек қатысты. Олар Кенесары хан ескерткішінің жанында сайысты бастап, жағалау бойымен 600 метрге жүгіріп, кері бұрылды. Мәреге бірінші болып жеткендер дипломдармен марапатталды. Жас желаяқтардың бірі Мерей Мұхмет астанадағы №32 мектептің 9-сыныбында оқиды екен.
– Салауатты өмір салтының құрдастарым арасында сәнге айналғанына қатты қуанамын. Бұл – менің екінші жүгіруім. Бұған дейін былтыр BI-Марафонға қатысқанмын. Биыл тағы қатысу жоспарымда бар, – дейді ол.
