iKomek: жедел шешім қабылданады
«Астана – ақылды қала» жобасы аясында елорданы тиімді басқару, астаналықтар мен қала қонақтарына қауіпсіз және жайлы орта қалыптастыру мақсатында 2017 жылдың желтоқсан айында «iKomek» қалалық мониторинг және жедел әрекет ету орталығы құрылған болатын. Енді, міне, «iKomek»-ке «Smart Astana» мобильді қосымшасы арқылы өтініш беруге мүмкіндік туды. Автоматты түрде жүйеге келіп түскен онлайн-өтініш бірден бақылауға алынады. Одан әрі «iKomek» орталығы аталған өтінішті жауапты орындаушыларға жібереді. Демек, көмек сұраған әрбір адамға Google Play және Apple Store жүйесінен «Smart Astana» қосымшасын жүктеп алу жеткілікті.
Жүздеген мекемеге қатысты сұрақ – 109 нөміріне
iKomek орталығын құрудағы негізгі тұжырымдама АҚШ-тың 311 және 911 қызметінің идеясынан туындаған. Мәселен, 311 нөмірі АҚШ-тың 300-ден аса қаласында мемлекеттік және федералдық қызметтің 4 мың түрі бойынша жұмыс жүргізеді деседі. Ондағы қалалық сервис орталығының оператоларымен тұрғындарға тәуліктің кез келген уақытында хабарласуға мүмкіндік қарастырылыпты.
Ал Астанадағы iKomek орталығының 109 нөмірі АҚШ-тың осы 311 қызметіне ұқсастырылып құрылған. Бүгінде су, жылу, электр энергиясы, коммуналдық төлем (ЕРЦ), қоғамдық көлік сияқты барлық коммуналдық қызмет жөніндегі колл-орталықтар iKomek орталығына біріктірілген.
– Астаналықтарға ыңғайлы болу үшін құрылған бұл орталық коммуналдық қызметтер мен қалалық кеңселермен өзара іс-қимыл жасауға мүмкіндік береді, – дейді iKomek мониторинг және жедел әрекет ету орталығының басшысы Жаннат Дүбірова.
Қазіргі уақытта қалалық әкімдіктің 17 басқармасы мен 4 аудандық әкімдік және 33 коммуналдық қызмет, 605 ПИК, 81 лифт шаруашылығына бағытталған сұрақтарды 109 қысқа нөміріне хабарласып, қоюға болады. Айта кету керек, орталыққа қалалық немесе мобильдік байланыс тегін. Осылайша бұрын қоңырауға жауап бермейтін коммуналдық қызметтердің мәселесі біржақты болды.
Алдағы уақытта 112 қызметі құрылады
Сондай-ақ заман ағымына қарай орталықпен тек телефонмен ғана емес, әлеуметтік желілер арқылы да хабарласуға мүмкіндік қарастырылған. Өткен жылдың қаңтарынан бастап фейсбук пен инстаграмға тіркелген орталыққа тек ғаламтордың өзінен 12 ай ішінде 90 мыңнан аса өтініш түсіпті. Жақында орталық телеграм-бот пен қалалық әкімдік сайтына енгізілсе, енді арнайы мобильді қосымша іске қосылды. Қала басшылығына аптаның әр күнінде тәулік бойы қолжетімді болатын бұл қосымша қаржымен қатар, уақытты да үнемдей түспек. Мәселен, бұрын апатты жағдайлар жөніндегі ақпараттар бақылауға ыңғайсыз әрі ақылы SMS-хабарламалар түрінде жіберіліп келген екен. Жаннат Дүбірованың мәліметінше, орталыққа бір жыл ішінде миллионнан аса өтініш түсіп, оның 80 пайызы бірінші хабарласудан соң шешіліпті.
Жан-жақты оқытылып, біліктіліктерін арттыру курстарынан өткен кәсіби 78 оператор қаладағы барлық коммуналдық қызмет пен тіршілікпен қамтамасыз ету жөніндегі кез келген сұрақ бойынша хабарласқан тұрғындарға мүдірмей жауап береді. Барлық өтініш тіркеу нөмірімен тұрғындар шағымының тізіміне енгізіліп, әрі қарай мәселе белгілі бір уақытта шешілу үшін мемлекеттік органдар мен коммуналдық қызметтерге беріледі. Әр оператор 1300 қызмет түрі бойынша жауап беруге қауқарлы. Мамандар қоңырауға 16 секундта, #Astana109 хэштегін белгілесеңіз, әлеуметтік желіде 10 минутта назар аударып, сұрақ 7 күн ішінде қаралады.
Күн сайын 5 мыңнан 14 мыңға дейін өтініш келіп түссе, орта есеппен күніне 2 мың өтініш бойынша жұмыс жүргізіледі екен. Нәтижесінде соңғы уақытта әкімдік аппараты мен басқармалардың, аудан әкімдіктердің кеңсесіне келетін хаттар 20 пайызға төмендеген көрінеді.
Заманауи цифрлық технологияларды тиімді пайдаланудың үлгісі болған бұл тәжірибе алдағы уақытта еліміздің барлық өңірінде қолданылмақ.
Алдағы уақытта АҚШ-тың 911 қызметіне ұқсас 112 қызметін құру жоспарлануда. Яғни осы қызметке қаланың төтенше жағдай жөніндегі 101, 102, 103 нөмірлері бір колл-орталыққа біріктірілмек.