Qoly şipaly därıgerge jūrtşylyq ızdep kelıp qaralady. Nūrbol Nūrlanūly da sondai sanauly saŋlaqtardyŋ qatarynda. Ol 2000 jyly Astanaǧa alǧaş ret jas maman retınde kelgende qalada bırde-bır tanysy joq-tyn. Al, qazır bılıktı mamandy tanymaldylyq özı ızdep tapty. «Är ota jasaǧan adam özıŋnıŋ et jaqyn tuysyŋdai bolyp ketedı. Sebebı, syrqat adam aiaǧynan tūryp ketkenşe onyŋ taǧdyryna alaŋdaulysyŋ», – deidı QR Densaulyq saqtau ısınıŋ üzdıgı, medisina ǧylymynyŋ kandidaty Nūrbol Tūrsynbaev.
Taŋdauyn adaspai tapqan…
Medisina ǧylymdarynyŋ atasy sanalatyn hirurgiia – kürdelı sala. Medisinalyq oqudy taŋdaǧandardyŋ köpşılıgı būl salaǧa baruǧa jüreksınedı. Nūrbol Nūrlanūlymen bırge osy fakultette oqyǧan 12 balanyŋ 8-ı studenttık kezdegı alǧaşqy otadan keiın-aq, hirurg boludan bas tartypty. Al Nūrbol kerısınşe, ota üstelınde ömırı üşın küresıp jatqan adam özıne erekşe küş-quat bergenın aitady. «Ota jasalyp jatqan adamnyŋ jūdyryqtai jüregınıŋ soǧysy maǧan ruh syilady. Ol ömır üşın küresıp jatty. Sol sätte jan-düniemdı «būl adamnyŋ jüregınıŋ soǧysy toqtamauyna men kömektesuge tiıspın, onyŋ ömırıne araşa tüsuım kerek» degen oi bilep alǧany sonşalyq, qorqu degendı mülde ūmyttym», – deidı Nūrbol.
Pedagogtar otbasynda tuyp-ösken Nūrbol bırde qatty auyryp qalady. Auruhana tösegınde jatqan oǧan hirurg bolyp jūmys ısteitın jaqyn tuysy qarailasyp tūrǧan. Özın ainalyp-tolǧanǧan därıger tuysynyŋ ıltipaty bala Nūrboldyŋ boiyna medisinaǧa degen, onyŋ ışınde hirurg mamandyǧyna degen süiıspenşılıgın oiatady. Mektep qabyrǧasynan keiın Şymkenttegı medisinalyq universitetke oquǧa tüsedı. Basynda farmasevtika salasyna kelgen ol köp ūzamai būl mamandyqtyŋ özıne qol emestıgın sezınedı. Rektorǧa hat jaza jürıp, özı qalaǧan hirurgiiaǧa auysyp alady.
Şyŋdalu mektebı
Hirurgtyŋ qoly – näzık, közı – qyraǧy, jüregı – aibarly boluy kerek desıp jatady. Adamnyŋ ışkı aǧzasyn künde aqtaratyn hirurgtardy qatygez sanaityndar da bar. Bıraq Nūrbol Nūrlanūlynyŋ äŋgımesınen keiın būl pıkırdıŋ jaŋsaq ekenıne közıŋız jete tüsedı. Ol ota jasalǧan är adamnyŋ ömırıne özın jauapty sanaitynyn aitady. Tıptı, bır ota-dan keiın bırneşe kün, ailar boiy auyr oiǧa batyp, jürek pen jüikege salmaq tüsetın kezder az bolmaidy eken. Keide otanyŋ kürdelılıgı sondai, 10-12 saǧatqa sozylyp ketetını bolady. Künnıŋ qaşan şyǧyp, batqanyn aŋǧarmai jūmysyna berılgen hirurgtardyŋ mūraty – hal üstınde jatqan adamnyŋ ömırın araşalap qalu. Nūrbol Nūrlanūly özınıŋ mamandyǧyn – mamandyqtyŋ töresı sanaidy. «Mamandyǧymnyŋ arqasynda talai adamnyŋ ömırın araşalap, alǧysyna ie boldym. Jūrtşylyqtyŋ alǧysy men batasyn alǧanda, ota kezındegı qinalysyŋdy lezde ūmytyp ketesıŋ», – deidı ol.
Nūrbol Tūrsynbaevtyŋ Astanadaǧy eŋbek joly Abai Baigenjin basqaratyn Ūlttyq ǧylymi medisinalyq ortalyqtan bastaldy. Osynda taban audarmai 14 jyl qyzmet etıptı.
– Būl ortalyqtyŋ materialdyq-tehnikalyq bazasynyŋ myqtylyǧyn bylai qoiǧanda, därıgerlerı de şetınen bılıktı. Osy mekeme maǧan ülken mektep boldy. Nebır kürdelı operasiialardy osynda igerıp, zamanaui medisinalyq qūrylǧylardyŋ tılın meŋgerdım, – deidı därıger.
Nūrbol Nūrlanūly ūstazy, akademik Jaqsylyq Dosqalievpen bırge, kädımgı hirurgiialyq operasiialardan tys, bauyr, büirek auystyru operasiialaryna da qatysty. Nūrbol Tūrsynbaev – transplantasiia jasau ädısın Astanaǧa alǧaş engızgenderdıŋ qatarynda.
Maqsatym – auruhananyŋ jaǧdaiyn tüzeu
Nūrbol Tūrsynbaev biylǧy aqpan aiynan bastap, №2 Aqmola oblystyq klinikalyq auruhana bas därıgerınıŋ orynbasary bolyp keldı. Qazırgı taŋda emdeu mekemesınıŋ basşysy qyzmetınen ketuıne bailanysty ol bas därıgerdıŋ mındetın atqaryp jür.
№2 Aqmola oblystyq auruhanasy Astananyŋ maŋaiynda ornalasqan Selinograd, Arşaly, Ereimentau, Astrahan, Şortandy, Egındıköl audandarynyŋ, barlyǧy 200 myŋdai tūrǧynyna medisinalyq qyzmet körsetedı. Mūnda 7 bölımşe bar. Därıgerlerdıŋ ūzyn-sany – 60-qa juyqtaidy.
– Oblystyq auruhana Astanada ornalasqanymen, materialdyq-tehnikalyq bazasy elordalyq deŋgeige sai kelmeidı, – deidı Nūrbol Nūrlanūly. Būl auruhanaǧa soŋǧy segız jylda bırde-bır medisinalyq qūrylǧy satyp alynbaǧan. Syrqattardy älı künge deiın äbden eskırgen täsılmen emdeidı. Nūrbol Tūrsynbaevtyŋ aldynda endı ülken jauapkerşılık tūr. Onyŋ maqsaty – auruhanany aiaǧynan tūrǧyzyp, joǧary medisinalyq kömek körsetetın zamanaui mekemege ainaldyru.
– Bızdıŋ auruhana auyl tūrǧyndaryna qyzmet körsetedı. Qalanyŋ adamdarynan görı şalǧai audan, auyl tūrǧyndary joǧary medisinalyq kömekke mūqtaj. Sondyqtan bügınge deiın jinaǧan azdy-köptı täjıribemdı osy auruhananyŋ jaǧdaiyn köteruge jūmsasam deimın.. Mekememızdıŋ jaǧdaiy tüzelıp, elge paidamyz tiıp jatsa, alǧa qoiǧan maqsatymnyŋ oryndalǧany, – deidı Nūrbol Tūrsynbaev.
Qazır №2 Aqmola oblystyq klinikalyq auruhanasynyŋ materialdyq-tehnikalyq bazasyn jaqsartu maqsatynda arnaiy strategiialyq jospar jasalyp, biznes-jospar bekıtılgen. Äzırşe auruhana tızgının ūstap otyrǧan jas basşy demeuşıler tauyp, emdeu mekemesınıŋ müşkıl halın köteru üşın türık memleketınıŋ ısker azamattarymen kelısımşarttar jasap ülgerıptı.
Qymbat TOQTAMŪRAT
