Bırde Jaŋa jyldyŋ qarsaŋynda äielderge arnalǧan küntızbe satyp aldym. Basqa küntızbelerden erekşeleu bazarlyǧym özıme öte qattty ūnady. Aşyq boiaumen salynǧan gül men miualy jemısterge toly sebetı bar natiurmort suretı de, äzıl-qaljyŋy aralas atauy bar toltyratyn bos bölımderı de, sandary aiqyn küntızbesı de – bärı köŋılımnen şyqty.
Üige kele sala, qolyma qalam alyp küntızbemdı yjdahattap toltyrmaqqa otyrdym. Söitsem, keibır otaǧasyna arnalyp, «sorpanyŋ qainau uaqyty, şūlyq-şūlǧauyŋdy bälen jerden tauyp al, ydys juu kezegı» degen nūsqaulary bızdıŋ qaraköz hanymdarǧa onşa kelıŋkıremeidı eken. Osy küiınde toltyryla qalsa, otaǧasy oirandamasa da otbasynda bır kikıljıŋ bolary aidan anyq. Sonda da bolsa bos qaldyrmas üşın ol jerlerdı basqaşa toltyryp qoiudy jön kördım. Ydys juu kezegı dep, düisenbıden jeksenbıge deiın bölıngen orynǧa men otbasyma arnap «Osy künnıŋ bärınde de men senderdı jaqsy körem» dep jazyp qoidym. Taǧy da bır jerınde «Ömır öte tamaşa, taŋǧajaiyp!» dep ūrandattym.
Al, özıme erekşe ūnap, özgertpesten toltyrmaq bolǧan bölım «Süiıktım, maǧan syiǧa…» degen tarau edı. Köp oilanbastan- aq kökeide jürgendı bügıp qalmai, lekıtıp tızbektete jöneldım. Sonymen, «süiıktım, maǧan syiǧa: qūndyz börık, asyl ışık, gauhar saqina men syrǧa, Gavai araldaryna joldama…». Äi, armandasam da artyq kettım-au dep, jaqşanyŋ ışıne «Türkiiaǧa bolsa da jaraidy» dep tüzetıp qoidym.
Jaŋa jyl da jettı, küntızbe qabyrǧaǧa ılındı. Üidegıler japyrlasyp, qarap jatyr. Otaǧasy «Maǧan syiǧa…» degen tarauǧa jetkenınde basyn şaiqap, «Taǧy bıraz oilansaŋşy, myna tılekterıŋ azdau emes pe?» dedı mysqyldap. Men baiǧūs baia-şaia: «Jūrttyŋ kelınşegı kigendı osy jasqa kelıp men nege kimeimın? Adamnyŋ qory būl künde, eŋ bolmasa, Qytaiǧa baryp keldı, osy men kımnen kemmın?» deimın qaljyŋǧa naz aralastyra.
Degenmen, būl özı bır qyzyq dünie boldy. Sol künnen bastap üige kelgen qonaqtar qoldaryna qalam ala salyp, törde ılulı tūrǧan küntızbenıŋ aşyq qalǧan jerlerıne bızge degen öz tılekterın jazudy ädetke ainaldyrdy. Sonymen, küntızbe tek kün sanau mındetın atqaryp qoimai, özdıgınen üiımızdıŋ tılekşısıne de ainalyp kettı.
Jarty jyldai uaqyt öttı, eleulı özgerıssız künder ötıp jatty. Jadyrap jaz da jettı. Bırde qyzyn ertıp naǧaşy äpkem kele qaldy. Bır sözınde jaqynda Türkiiaǧa demalysqa baratynyn aityp qaldy. Men: «Oi, ne degen baqyttysyŋ! Men bolsam,ondai demalys jaily qiialdap, onymdy tek qaǧazǧa tüsırıp qoidym» degenım sol-aq eken, qasymda otyrǧan qyzym jūlyp alǧandai: «Sız de baryŋyz» degenı…
Men taŋǧalyp qyzyma qaraimyn. Ol bolsa:
–Jaqynda jūmysqa tūrǧanyma bır jyl tolady. Bastyq «demalysqa jıbere almaimyz, bıraq esesıne syiaqysyn qosa, demalys jalaqysyn beremız» degen. Joldamaŋyzǧa keŋ-mol jetıp qalady, – deidı jymiyp.
Esımdı «Almaty-Bodrum» ūşaǧynda bır-aq jidym. Türkiia jerınıŋ san ǧajaiyptary – ol bır bölek äŋgımege arqau, al būl saiahat küntızbege jazǧan tılekterdıŋ oryndaluynyŋ bastamasy ǧana edı.
Jaz ötıp, küz keldı, Astana qūrylystarynda qūlşynyp eŋbek etıp jürgen joldasym üige oraldy. Qanjyǧasy mailansa kerek, külımdep, kele sala «Jür, kettık» deidı. Esıgınen attai almai jürgen zergerlık dükenge jetektep äkep:
– Al, qalaǧanyŋdy taŋda, – dedı.
Osydan soŋ ömır öte tamaşa, taŋǧajaiyp demei kör!
Qys tüstı. Jaŋa jyl eseiıp, eskı jylǧa ainaldy. Jaŋasyna auystyrmaq bolyp, eskırgen küntızbege taǧy da köz jügırttım. «Tört közımız tügel, äkelgen berekeŋe täube» dep, ötken jylǧa salauat aityp, jaŋa jylǧa «Qoş keldıŋ!» deimın. Üidegıler jamyrasyp: «Tılekterıŋnıŋ bärı de oryndaldy ǧoi, razymysyŋ?!» deidı. Oŋailyqpen jeŋıletın men be: «Joǧa, älı de qūndyz börık, asyl ışık alynbai qaldy» deimın qasarysyp.
–Bodrumnan alǧan bylǧary kürteşe men ton solardyŋ ornyn baspai ma? – deidı olar da menen qalyspai.
Qalammen jazylǧan närsenı baltalasaŋ öşpeidı demekşı, oinap- külıp jürıp jazylǧan tılekter osylaişa jyl ötpei mültıksız oryndaldy.
Şırkın, sonda da adamnan pendeşılık qalǧan ba, sol kezde jaqşany aşpai qoisam, Gavai araldarynan bır-aq şyǧar ma edım degen oi menı anda-sanda älı de mazalap qoiatynyn sızderden jasyrmai-aq qoiaiyn.
Ne närsenı qiialdasaŋyzdar da, armandaryŋyz anyq oryndalady, tek ärqaşan ömır öte tamaşa jäne taŋǧajaiyp ekenın ūmytpaŋyzdar!
Jaŋa jyl barşaŋyzǧa berekesın äkelsın, aǧaiyn!
Maruana HAMZAQYZY
