GÜLBEGI
Adam janyn jadyratyp, köŋılın kötertude gülden asqan syilyq joq. Gül jan-jaǧyna jūparyn şaşady. Ainalaǧa sūlulyq, näzıktık syilaidy.
Alaida, gül köŋıl quanyşy tärızdı, oŋailyqpen qol jetkızbeidı.
Gül ösırude oǧan jan-tänımen qarap, bükıl yqylasyn böletın jandar ǧana jetıstıkke jetedı.
Baǧbandyqty özıne serık etken arulardyŋ bırı – «Astana kögaldandyru» AQ-nyŋ qyzmetkerı Ūrqiia Alpanova. Eŋbek jolyn 1999 jyly gül eguden bastaǧan ol bügınde elordamyzdaǧy äsem saiabaqtar men demalys oryndaryndaǧy gülzarlaryn kütıp, baptauda.
Köktem kelıp, tırşılıkke jan bıtkende gül ösıruşılerdıŋ de jūmysy qyza tüsedı. Aqpan aiynda tūqymy sebılgen gülder de osy kezden bastap aialy alaqan men qamqor köŋıldı qajet ete bastaidy. İä, künnıŋ nūry men jyluy, jerdıŋ närı, su qajet bolǧandai gülderge näzık köŋıl de kerek.
Däl osyndai kezde Ūrqiia Alpanovanyŋ da quanyşyna quanyş qosylyp, boiyna erekşe meiırımdılık bıtkendei bolady.
Mamyrdyŋ bas kezınde gül ösıruşıler köşelerge gül otyrǧyza bastaidy eken. Būl jūmys bır aiǧa sozylady. «Astana kögaldandyru» mekemesı jalpy qala boiynşa būl aida künıne bes myŋ tüp gül otyrǧyzyp ülgeredı. Egıletın gülder äraluan. Olardyŋ arasynda bırneşe tüsten tūratyn güldıŋ otyz alty türı bar.
Ūrqiianyŋ aituynşa, adamnyŋ mamandyǧy mınezıne äser etedı. Gül ösıru, rasynda da adam janynyŋ meiırımdılıgı men näzıktıgın saqtap qalady. Sezımtaldyq, sūlulyqqa, tazalyqqa qūştarlyq – baǧbandardyŋ ortaq qasietı. Būl oraida «Ärbır ekken gülım men üşın qymbat, tıptı olardy keide öz balamdai älpeştep qarauǧa tyrysamyn», – deidı ol.
Gül kütıp-baptaityny özıne ūnaidy. «Ol köŋıl-küiıme erekşe äser beredı. Gülder – tırşılık ataulynyŋ oianuy men jaqsylyqqa degen ümıttıŋ nyşany. Sondyqtan, gül ösıruşı bolǧanym üşın özımdı baqytty sanaimyn», – deidı Ūrqiia apai.
Syilyqqa gül alǧandy ūnatatyn Ūrqiianyŋ süiıktı gülı – lalagül. Ol – meiırımdılık pen jan tynyştyǧynyŋ bır belgısı ıspettı.
Gül ösıru Niderlandy, Germaniia, Japoniia syndy elderde jaqsy damyǧan. Atalǧan elder bügınde güldıŋ arqasynda qyrǧyn paidaǧa kenelıp otyr. Ata-babamyz köşpendı tırşılık keşıp, kögaldandyruǧa asa köp män bermegendıkten, būl sala bızge keşeuıldep kelgen. Degenmen, qazırgı taŋda gül ösıru bızdıŋ elde de örkendep keledı.
Äiel adamnyŋ baqyty – ana atanu. Jany jas balanyŋ janyndai taza, köŋılı näzık arudyŋ köŋılındei päk Ūrqiia Iliiasqyzy bügınde ekı qyzdy meiırımdılık pen imandylyqqa tärbielep, ösırıp keledı. Qyzdary da anasy siiaqty üide gül ösırgendı ūnatatyn körınedı.
«Perzentterıme ata-babamyzdan kele jatqan salt-dästürımızdı sıŋıre jürıp, qazaqylyqqa tärbieledım. Ananyŋ eŋ bırınşı tıleitını balalarynyŋ amandyǧy. Menıŋ de basty tılegım – osy. Közımnıŋ aǧy men qarasyndai bolǧan qyzdarymnyŋ azamat bolyp ösıp, elıne adal qyzmet etkenın qalaimyn. Analyq nietım – osy» – deidı ol.
Ūrqiia Alpanova süiıktı käsıbın ary qarai döŋgeletıp, elordamyzdyŋ äsemdene beruıne meilınşe üles qosqysy keledı. Onyŋ janaryndaǧy gülge ıŋkärlıgı, öz mamandyǧyna degen mahabbaty bızge osyny aŋǧartqandai boldy.
Ainūr QARAMENDİEVA