Elbasy özınıŋ «Bolaşaqqa baǧdar: ruhani jaŋǧyru» atty maqalasynda «Bolaşaqta ūlttyŋ tabysty boluy onyŋ tabiǧi bailyǧymen emes, adamdarynyŋ bäsekelık qabıletımen aiqyndalady» dei kele, ärbır qazaqstandyqtyŋ boiynda boluy kerek qasietterdıŋ qataryna köptıldılıktı kırgızdı.
Tanymal ǧūlama, Äbu-Nasyr äl-Farabi ömırınde 76 ūlttyŋ tılın bılgen. Ūly Abai orys-qazaq tılderımen qatar parsy, arab tılderın de meŋgergen. Bügınde olardyŋ ūrpaǧy, iaǧni, zamanaui qazaqstandyqtar da kemınde üş tılde erkın söilep, jaza alady.
Köp tıldılık nätijesınde naqty qandai artyqşylyqtarǧa ie bolamyz? Eŋ äuelı, bäsekege qabılettılıkke qol jetkızemız. Özge eldıŋ tılın üirenu arqyly är adam kez kelgen şeteldık ortany jatyrqamai, jalpy aqparattyq qoǧamǧa oŋai beiımdeledı. Aǧylşyn jäne orys tılderın üirenu basqa elde täjıribe almasuǧa, tanymdyq közqarasty qalyptastyruǧa, basqa ūlt ökılderımen qarym-qatynas ornatuǧa mümkındık tuǧyzady. Ekınşıden, mektepte oqu pänderın ekı nemese odan da köp tılderde audarmasyz oqytuǧa qol jetkızemız. Üşınşıden, eŋbek naryǧynda joǧary sūranysqa ie bolamyz.
Elımızde köptıldılıktı, onyŋ ışınde üştıldılık saiasatyn qoldauǧa arnalǧan köptegen bastama boi köterude. Mäselen, solardyŋ bırı retınde byltyrǧy English For Jastar jobasyn aituǧa bolady. Ekı aiǧa sozylǧan būl jobanyŋ maqsaty Qazaqstandaǧy 84 auyldyq aimaqtaǧy 7 myŋdai oquşyǧa aǧylşyn tılın üiretu edı. Jobaǧa erıktı retınde Halyqaralyq «Bolaşaq» baǧdarlamasy boiynşa şetelde bılım alyp kelgen jastar, aǧylşyn tılın joǧary deŋgeide bıletın azamattar jäne aǧylşyn tılı pänınıŋ mūǧalımderı qatysyp, şäkırtterge tegın bılım berdı.
Sondai-aq «Bolaşaq» korporativtı qorynyŋ qoldauymen Social Lift platformasynda jüzege asqan Open English jobasy da özınıŋ tiımdılıgın däleldegen bastamalardyŋ bırı boldy. Jobanyŋ saraptamalyq toby Kembridjdık KET jäne RET emtihandary negızınde oquşylarǧa arnalǧan 3-moduldık oqu baǧdarlamasyn jäne oqytudyŋ tiımdı ädısterı men kouching täsılderınen tūratyn aǧylşyn tılı oqytuşy-volonterlerdı daiarlaudyŋ qarqyndy kurstaryn äzırledı. Joba komandasyna oqytuşy-volonterler men jattyqtyruşylar retınde Nazarbaev ziiatkerlık mektepterı men Nazarbaev universitetınıŋ, elordalyq joǧary oqu oryndarynyŋ şet tılder kafedralary studentterı men tülekterı, aǧylşyn pänınıŋ oqytuşylary kırdı.
Osy sekıldı igılıktı bastamalar aldaǧy uaqytta da öz jalǧasyn tapsa, nūr üstıne nūr bolar edı.
Naima NŪRALYQYZY,
Qarjy akademiiasynyŋ studentı
