Juyrda ötken Ükımettıŋ keŋeitılgen otyrysynda Memleket basşysy Qasym-Jomart Toqaev mügedekterdı qoldau jüiesın küşeitudı tapsyrdy. Elordada osy künderı 25 myŋǧa juyq mümkındıgı şekteulı jan, sonyŋ ışınde 5 myŋǧa tarta erekşe qajettılıgı bar bala tırkeude tūr. Olardy oqytu, jūmyspen qamtu, sportpen ainalysu men demalularyna jaǧdailar jasau özektı mäselelerdıŋ qataryna jatady. Bas qalada būl tarapta bırşama ıster qolǧa alynǧan. Alaida tüitkılder de joq emes. Äsırese, keibır nysandardyŋ qoljetımdılıgıne qatysty problemalar bar.
«NŪRLY JÜREKTIŊ» FİLİALDARY AŞYLSA…
Elordanyŋ Jūmyspen qamtu jäne äleumettık qorǧau basqarmasyna arnaiy äleumettık qyzmetpen ainalysatyn segız mekeme qaraidy. Solardyŋ bırı – «Nūrly jürek» äleumettık qyzmet körsetu ortalyǧy. Atalmyş ortalyq balalardyŋ damu deŋgeiıne bailanysty qozǧalmaly em, äleumettık beiımdeu, äleumettık-tūrmystyq baǧyt-baǧdar beru, äleumettık eŋbekke üiretu toptaryna bölıngen. Qazırgı taŋda mekeme 280 bala men jastarǧa türlı qyzmetter körsetedı. Mekeme direktory Serık Böpejanovtyŋ aituynşa, köbırek balany qamtu üşın qalada ortalyqtyŋ filialdary aşyluy kerek.
– Bızge «Öndırıs», «İlinka», taǧy osy siiaqty qalanyŋ şetkı aumaqtary sanalatyn audandarynan ata-analar balalaryn äkeledı. Qalada tūrǧyn üi qūrylysy qarqyndy jürgızılıp, baspana köptep salynyp jatqanyn estimız. Tūrǧyn üi keşenderınde filialdarymyz aşylsa, jaqsy bolar edı. Sol kezde ata-analar balalaryn alysqa aparmai, üilerınıŋ janynda qyzmetımızdı alar edı. Būl jaǧdai balany otbasynda saqtau üşın de özektı. Mäselen, būryn 180 jetkınşekke qyzmet körsettık. Sonyŋ ışınde 140 bala stasionarda jatatyn. Qazırgı taŋda 280 balanyŋ 150-ı ǧana stasionar qyzmetın paidalanady. Iаǧni qanşama balany otbasynda saqtap qaldyq. Filialdarymyz aşylsa, ata-analar invataksi jaldau, basqa da balaǧa qatysty qaptaǧan problemalardan qūtylar edı, – deidı Serık Elemesūly.
KÜNINE 100 ADAM – JAQSY KÖRSETKIŞ PE?
Ötken jyly elordada memlekettık-jekemenşık ärıptestık aiasynda elımızde teŋdesı joq Paralimpiadalyq jattyǧu ortalyǧy aşyldy. 4682,70 şarşy metr aumaqta boi kötergen nysan bır künde 780 adamdy qabyldauǧa qauqarly. Alaida ortalyq qyzmetın köp bolsa künıne 100 adam ǧana paidalanady. Jaqynda osy mäselege qalalyq mäslihat deputattary nazar audardy. Onyŋ da öz sebepterı bar. Qaraötkel-3 kentınde oryn tepken ortalyqqa ekı avtobus qana barady. Jūmyspen qamtu jäne äleumettık qorǧau basqarmasynyŋ bölım basşysy İlia Skoptyŋ aituynşa, Kölık jäne jol-kölık infraqūrylymyn damytu basqarmasymen qoǧamdyq kölık baǧdarlaryn köbeitu boiynşa jūmys jürgızılgen. Bıraq nätije älı körınbeidı.
– Jeke ärıptestermen bırge ortalyqqa adamdardy tartu ısı tūraqty jürgızıledı. Būl üşın «Astana Motors» kompaniiasy ekı mikroavtobus böldı. Menedjerler mektepterge, ärtürlı ūiymdarǧa baryp, kelıssözder jürgızedı. Är aluan beinerolikter äzırlenude. Qoǧamdyq bırlestıktermen bırlesıp, ärtürlı şaralar ötkızılıp, jaŋa seksiialar aşyluda. Mümkındıgı şekteulı jandardy tasymaldau üşın arnaiy karta äzırlendı. Qazırgı kezde nysanǧa adamdardy tartuǧa Mädeniet jäne sport basqarmasy men Jūmyspen qamtu jäne äleumettık qorǧau basqarmasy jauapty. Keluşılerdıŋ sanyn ūlǧaitu üşın būl ıske Qoǧamdyq densaulyq saqtau basqarmasy men özge de medisinalyq ūiymdardy tartu kerek dep esepteimız. Kölık jäne jol-kölık infraqūrylymyn damytu basqarmasy Paralimpiadalyq jattyǧu ortalyǧynyŋ aldynda aialdama ornatudy tezdetıp, avtobus baǧdarlaryn köbeitu mäselesın qarauy tiıs. Mūny arnaiy kartaǧa qarap ısteuge bolady. Bılım basqarmasy mektep avtobustarynyŋ mügedekterdı tasymaldau mäselesın qarasa degen tılegımız de bar. Küz mezgılınıŋ aiaǧyna qarai ortalyqqa keluşılerdıŋ sanyn künıne 150 adamǧa jetkızudı, al kelesı jyldyŋ basynda 160 adamǧa ūlǧaitudy josparlap otyrmyz, – deidı Qalalyq ortany regenerasiialau basqarmasynyŋ basşysy Arjan Būǧybaev.
Ūlttyq Paralimpiada komitetınıŋ atqaruşy direktory Erlan Süleimenovtıŋ būǧan aitar öz uäjı bar. Onyŋ pıkırınşe, ortalyq qyzmetın 100 adam paidalansa, onyŋ özı jaman körsetkış emes.
– Mügedektık tobyna bailanysty barlyq adam sportpen ainalysa almaityny belgılı. Keşe ǧana «Saryarqa» velotregınıŋ direktorymen söilestım. Ol qaladan sporttyq nysanǧa künıne 400 adam keletının aitty. 1 millionnan asa tūrǧyny bar qala üşın būl tük emes. Soǧan qaramastan ärıptesım osyny jaqsy körsetkışke balaidy. Al endı qaladaǧy mügedekter sanyn baǧamdasaq, mümkındıgı şekteulı jannyŋ 100-ı ortalyǧymyzdyŋ qyzmetın paidalanǧanyn jaman körmeimın, – deidı Erlan Mūratūly.
Paralimpiadalyq jattyǧu ortalyǧynyŋ qyzmet körsetu sapasyna köŋılı tolmaityn, sonyŋ ışınde jattyqtyruşylar men nūsqauşylardyŋ bılıktılıgıne kümändanatyn mümkındıgı şekteulı jandar da bar. Qalalyq mäslihatqa solardyŋ tarapynan aryz-şaǧymdar tüsken. Sonyŋ ışınde ortalyqta arbaǧa taŋylǧan jandarǧa sportpen ainalysuǧa mülde jaǧdai jasalmaǧanyna nalyǧandar tabyldy.
«Mūndai äŋgımenıŋ qaidan şyqqanyn bılmeimın. Ortalyqta 50 trenajer jūmys ısteidı. Sonyŋ segızı arbaǧa taŋylǧandarǧa arnalǧan» deidı būl turaly Erlan Süleimenov.
EKINŞI ORTALYQ SALU, ABONEMENT ENGIZU ŪSYNYLDY
Almas Erjan densaulyǧyna bailanysty sportpen ainalysa almaidy. Alaida su sporty türlerıne qyzyǧady. «Baiqastap qarasam, qalada arbaǧa taŋylǧan jandarǧa laiyq keletın bırde-bır bassein joq eken. Kran siiaqty suǧa tüsıretın qūrylǧyny kördım. Bıraq būl qūral qauıpsız emes. Ǧalamtor arqyly şetelderde arnaiy pandus arqyly suǧa tüsuge bolatynyn kördım. Bızge nege osy ülgını almasqa? Paralimpiadalyq jattyǧu ortalyǧyna kelsem, būl tarapta qalada bäsekelestık joq dep esepteimın. Sony bıletın ortalyq jūmysyna jauaptylar keluşılerdı tartuǧa nemqūraily qaraidy. Bäsekeles bolsa, jūmys jandanar edı. Tura osyndai bolmasa da, osyǧan ūqsas taǧy bır ortalyqty salaiyq. Kerek bolsa, investordy özım-aq tauyp bereiın. Jaǧdaidy sonda köremız. Negızı, osyndai nysandarǧa kelgende bizneske emes, mügedekterge köbırek köŋıl böluımız kerek. Iаǧni mümkındıgı şekteulı jandarǧa barlyq jaǧdailardy jasap, käsıpkerler soǧan qarap qimyldauy tiıs» deidı ol.
Jasūlan Süleimenov mügedekterge arnalǧan sporttyq nysandar üiınıŋ janynda joǧyn aityp: «Arbaǧa taŋylǧanyma jiyrma jyldan asty. Köşedegı sport nemese balalardyŋ oiyn alaŋdarynda sportpen ainalysamyn. Bır jaqsysy, turnikter densaulyq jaǧdaiyma laiyqtalǧan, boiyma şaq keledı. Özım oŋ jaǧalauda tūramyn. Arnaiy sporttyq nysandar alys bolǧandyqtan bara almaimyn. Osy tūrǧyda mügedekterge kädımgı sporttyq klubtar men seksiialar qyzmetın paidalanu üşın abonementtıŋ berıluın ūsynamyn» dedı.
QYZMET KÖRSETU ISINE BASYMDYQ BERILUI KEREK
Mäselenıŋ bır şeşımın Mügedekterdıŋ qazaqstandyq konfederasiiasy janyndaǧy «Dortstroitrest» JŞS-tıŋ «Ekor» ortalyǧynyŋ bas sarapşysy Jadyrasyn Säduaqasov ūsynady.
– Qaladaǧy nysandardyŋ 90 paiyzy eskı bolǧandyqtan, qyzmet körsetu ısıne basymdyq beruımız kerek. Paralimpiadalyq jattyǧu ortalyǧy – qalaǧa sözsız qajet nysan. Mūndai ortalyqtyŋ balamasy elımızde joq. Al TMD kölemınde tıptı az. Nysan, mıne, daiyn tūr. Bıraq mügedek oǧan kelmei nege üiınde otyr? Mäsele belgılı – nysanǧa jete almai otyr. Halyqaralyq täjıribenı eskerıp, «Nysandar men qyzmetterdıŋ qoljetımdılıgın qamtamasyz etu standarty turaly» qalalyq erejesın bekıtuımız kerek. Mūndai erejenı äzırledık. Būl qūjatty bekıtu ǧana qalyp otyr, – deidı sarapşy.
J.Säduaqasovtyŋ pıkırınşe, osy ıs qolǧa alynbaiynşa mügedekterdı ömırge beiımdeudegı tüitkılder aldymyzdan şyǧa beredı. Al S.Böpejanov mümkındıgı şekteulı jandar mäselesımen memlekettık organdar ǧana ainalyspai, oǧan tūtas qoǧam atsalysuy kerek dep esepteidı.
