Qazaq baspasözınde sportty aişyqty taqyrypqa ainaldyrǧan Seidahmet Berdıqūlovtan tälım alǧanyn maqtan etetın Nesıp Jünısbaiūly bügıngı taŋda özı de qarymdy, qaruly qalamgerge ainaldy.
Qalyŋ oqyrmany men şäkırtterı Nes-aǧa dep qūrmetpen qaraityn qalamgerdıŋ şyǧarmaşylyq qabıletı jastaiynan jarqyrap körındı.
Taldyqorǧan oblysynyŋ Qaratal audanyndaǧy «Köpbırlık» auylynda tuyp-ösken ol mektepten keiın köp oilanbastan Otan aldyndaǧy boryşyn öteuge attandy. Al äskerden oralǧan soŋ armany men maqsatyna ainalǧan QazGU-ge jol tartady. Jurnalist boludy qalaidy. Söitıp 1970 jyly jurnalistika fakultetıne qabyldanyp, 1975 jyly qyzyl diplommen bıtıredı. Jüregı qalaǧan mamandyqty meŋgergen betten «Leninşıl jas» gazetıne jūmysqa qabyldanady. Öitkenı jastar gazetınıŋ oqyrmandaryna Nesıp Jünısbaev esımı onyŋ student kezınen-aq tanys bolatyn. Sol kezdegı jüz myŋdaǧan oqyrmany bolatyn «Leninşıl jas» gazetınde sport jäne äskeri-patriottyq tärbie bölımın basqardy, redaksiia alqasynyŋ müşesı, käsıpodaq, komsomol, partiia ūiymdarynyŋ hatşysy boldy. Osy gazette jürıp sport salasyn oqyrmannyŋ eŋ süiıktı taqyrybyna ainaldyra bıldı.
1991 jyly Nesıp Jünısbaiūly respublikalyq «Sport» gazetıne bas redaktor bolyp taǧaiyndalady. Būl basylymda keŋınen kösıluıne jol aşyldy. Tek qana sportty jazyp qoimai, sportty memlekettık, ūlttyq tūrǧyda jandandyruǧa kırıstı. Sonyŋ bır aiǧaǧy egemen eldıŋ futbol chempionatyna qazaq jıgıtterınen qūralǧan komanda qosudy oilastyryp, ol maqsatyna da jettı. Ol üşın eldıŋ tükpır-tükpırınen talantty jastardy ırıkteu ūiymdastyryp, demeuşıler tauyp, «Namys» atty komandany Qazaqstan chempionatyna qosty. Sol komandada oinaǧan bırneşe futbolşylar keiınnen Qazaqstan ūlttyq qūramasy sapynda öner körsettı. Osydan keiın Nes-aǧany qalai qairatker demessıŋ?!
Nesıp Jünısbaiūlynyŋ ştattaǧy jūmysynan tys şyǧarmaşylyq eŋbegı de ūşan-teŋız deuge negız bar. Olimpiada oiyndaryna on ret baryp, futboldan bes älem chempionatyna qatysyp, jüzdegen reportajdar, maqalalar ūsynǧan qalamgerge qazaq oqyrmany dän riza ekenı sözsız. Qalamgerdıŋ qalamynan tuyndaǧan «Üşınşı raund», «Auyldan şyqqan alyptar», «Futbolmen tynystaǧan İspaniia», «Äkemnıŋ qamşysy», «Namys jyrtar ūl qaida?!», «Meksikadaǧy futbol toiy», «Mūstafa Öztürık», «Erejesız «beldesu», «Bas iemın!» atty maǧynaly-mazmūndy kıtaptary oqyrmannyŋ oljasyna ainalǧany da anyq. Sonymen qatar, el egemendıgın alǧaly ūlttyq komandamen qatysqan Olimpiada oiyndarynyŋ şejıresı bop sanalatyn, orys tılınde jazylǧan «Olimpiiskii marşrut» kıtaptarynyŋ tört tomy da Qazaqstan sportynyŋ tarihnamasy ıspettı.
Ünemı boiy sergek, oiy elgezek jüretın Nesıp Jünısbaiūly tek jazyp qana qoiatyn qalamgerdıŋ qataryna jatpaidy. Ol sportty ışınen bıletın maitalmannyŋ özı desek jarasady. 1996 jyly Qazaq deneşynyqtyru jäne sport institutyn bıtırıp, bapker-oqytuşy mamandyǧyn alǧan. Toǧyzqūmalaq sportynan sport şeberı, respublika chempiony. Qazaqstannyŋ eŋbek sıŋırgen jattyqtyruşysy.
Nesıp Jünısbaiūly qoǧamdyq jūmysqa da köp jegıletın azamattyŋ qatarynan sanalady. Är jyldarda QR sport Komitetınıŋ alqa müşesı bolyp sailandy. Halyqaralyq sport jurnalisterı Qauymdastyǧynyŋ (AIPS) müşesı, Aziia sport jurnalisterı Odaǧynyŋ (ASPU) Atqaru komitetınıŋ müşesı, Aziia sport baspasözı Odaǧy prezidentınıŋ keŋesşısı qoǧamdyq qyzmetterın abyroimen atqardy. Aziia Olimpiadalyq Keŋesınıŋ (OSA) baspasöz komitetınıŋ müşesı bolǧan tūŋǧyş ärı jalǧyz jurnalist. Qazaqstan sport baspasözı Qauymdastyǧyn qūruşy jäne tūŋǧyş prezidentı boldy.
Bır qaraǧanda qarapaiym bolyp körınetın Nesıp Jünısbaiūlynyŋ qazaq baspasözıne, onyŋ ışınde sport salasyna, ūlt müddesıne sıŋırgen eŋbegıne qarap qairatker ekenıne köz jetkızemız. Osy oraida elıne eleulı, halqyna qalauly azamattyŋ qūrmet pen marapattan kende qalmasy zaŋdylyq qoi. Būl rette Nesıp Jünısbaiūlynyŋ abyroiy da asqaq körınedı. Qazaqstan jurnalister jäne jazuşylar odaǧynyŋ müşesı, Baubek Būlqyşev atyndaǧy Jurnalister odaǧy syilyǧynyŋ, Seidahmet Berdıqūlov atyndaǧy syilyǧynyŋ iegerı. Qazaqstan Ūlttyq Olimpiadalyq komitetınıŋ «Jyldyŋ üzdık jurnalisı» syilyǧynyŋ laureaty. QR Prezidentınıŋ Alǧys hatymen, Astana qalasynyŋ 10 jyldyǧy, Qazaqstan halyq Assambleiasynyŋ 20 jyldyq Qūrmet medalımen marapattalǧan. Almaty oblysy jäne Qaratal audanynyŋ Qūrmettı azamaty ataǧynyŋ iegerı.
Nesıp Jünısbaiūly 2010 jyly Memleket basşysynyŋ Jarlyǧymen Qazaqstannyŋ eŋbek sıŋırgen qairatkerı ataǧyna ie boldy.
Osydan tura 70 jyl būryn qazaqtyŋ «Köpbırlık» degen alaqandai auylynda düniege kelgen qaǧylez bala bügıngı künde jūldyzy janǧan, halqyna jaqqan qalamger, qairatker bolyp otyr.
