Astana qalasynda merekelık jarystarmen atalyp ötıldı
Olimpiada oiyndarynyŋ tarihy 1884 jyldan bastalǧan edı. Osy jyly Per de Kuberten Halyqaralyq Olimpiada komitetın qūrudy ūsynyp, sodan berı düniejüzılık sport dodasyn ötkızu dästürı qalyptasty. Al 1948 jyldan berı Olimpiada künı ötkızılıp keledı. Qazaqstan aituly ūiymǧa 1992 jyly müşe bolyp qabyldandy.
Biylǧy Olimpiada künı elımızdıŋ barlyq oblys ortalyqtarynda, Almaty jäne Astana qalalarynda saltanatty jaǧdaida atalyp ötıldı.
Senbı, 23 mamyr künı elorda jūrtşylyǧy qalalyq saiabaqtaǧy Olimpiadaşylar alleiasyna jinalyp, merekelık jarystarǧa qatysty. Olardyŋ qatarynda Olimpiada oiyndarynyŋ jeŋımpazdary men jüldegerlerı, Parlament deputattary, ministrlıkter men mekemeler qyzmetkerlerı, äskeriler, studentter men mektep oquşylary boldy. Astana qalasynyŋ äkımdıgı, Qazaqstan ūlttyq Olimpiada komitetınıŋ astanalyq filialy, QR Mädeniet jäne sport ministrlıgı, «Astana EKSPO-2017» aksionerlık qoǧamynyŋ qoldauymen ötkızılgen merekelık şaranyŋ aşylu räsımınde QR Mädeniet jäne sport ministrı Arystanbek Mūhamediiaūly söz söilep, merekelık şaraǧa qatysuǧa kelgen barşa qauymǧa alǧysyn aityp, Qazaqstan sportynyŋ abyroiy asqaqtai beruıne tılek qosty. Olimpiada oiyndarynyŋ chempiondary Iýrii Melnichenko men Serık Säpiev astanalyqtar men qala meimandaryna rizaşylyǧyn bıldırdı.
Olimpiada künıne arnalǧan merekelık jarystyŋ baǧdarlamasy boiynşa 800 jäne 1200 metrge jügıru, balalar üşın «Olimpiadalyq saiys» taqyrybynda asfaltqa suret salu, mümkındıgı şekteulı sportşylardyŋ arbamen jarysy jäne velobäige ūiymdastyryldy.
– Men mūndai jarysqa bırınşı ret qatystym. Qatysuşylardyŋ qatarynda Olimpiada oiyndarynyŋ chempiondary da bolady degen soŋ ädeiılep kelgen edım. Men 800 metrge jügırdım. Eŋ bastysy, Olimpiada oiyndarynyŋ jüldegerı Giuzel Maniurova men halyqaralyq därejedegı sport şeberı Tatiana Amanjolmen bır qatarda jügırdım. Diplom aldym. Būl merekelık jarys esımde köpke deiın saqtalatyn şyǧar, – deidı Astana qalasyndaǧy №54 mektep-liseidıŋ 4-synyp oquşysy Aiajan Raihan.
– Osy merekelık şaraǧa kelgen barşa astanalyqtardy Olimpiada künımen qūttyqtaimyn. Būl Qazaqstan üşın de aituly kün dep esepteimın. Bız 1992 jyldan berı osy bedeldı halyqaralyq ūiymnyŋ müşesımız. Barlyq otandastarymnyŋ sportpen şūǧyldanyp, salauatty ömır saltyn ūstanuyna tılektespın, – dep atap öttı merekelık jügırudıŋ märesıne jetken sätınde Olimpiada oiyndarynyŋ chempiony Iýrii Melnichenko.
Kezek-kezegımen ötken merekelık jarystarda jüldeger atanǧan äuesqoi sportşylarǧa Halyqaralyq Olimpiada komitetınıŋ diplomdary jäne estelık syilyqtary berıldı.
