Elordamyzda BAQ ökılderı arasynda voleiboldan «Galina, bız senımen bırgemız!» qaiyrymdylyq turnirı öttı.
Qazaqstan sport jurnalistikasynda özındık qoltaŋbasy bar Galina Polevaia bır jyldan berı Türkiiada kezektı otadan keiın em-dom qabyldauda. «Endı kürdelı bır operasiiasy qaldy. Eger bärı sättı ötse, ekı aiaǧynan tık tūryp ortamyzǧa qaita oralady» deidı ärıptesı Äziz Jūmadıl. Rasymen de, otandyq sporttyŋ damuyna jäne sport jurnalistikasynyŋ örkendeuıne orasan eŋbegın sıŋırgen tılşı ūzaq jyldar elımızdıŋ «Qazaqstan» jäne «Habar» telearnalarynda jurnalistık qyzmet atqarǧan.
Osy oraida «BAQ liga» qoǧamdyq qorynyŋ qolǧa aluymen voleiboldan «Jas Ūlan» respublikalyq mektebınde taŋnan bastalǧan jarysqa jurnalisterden qūralǧan 12 komanda qatysyp, oiyn qas qaraiǧanda bır-aq aiaqtaldy. Ärtürlı respublikalyq BAQ ökılderınen qūralǧan turnirde «Novaia ploşad» jurnalister qūramasy jeŋımpaz atandy. Al «Habar» agenttıgı, «Elorda aqparat», «Qazmedia» ortalyǧy, «Egemen Qazaqstan», «Aiqyn-Liter» komandalary da tartysty oiyn örnegın körsettı.
Jarystan barlyǧy 440 myŋ teŋge jinalypty. Būl qarjy Galina Polevaianyŋ emıne jūmsalu üşın esepşotyna audaryldy.
Jadyra MŪRATBEKOVA
