«Duman» oiyn-sauyq ortalyǧynda «Kedergısız keleşek» jobasy aiasynda balalar üiınıŋ tärbielenuşılerıne arnalǧan ekskursiia jäne jaŋa formattaǧy 3D suretterınıŋ tūsaukeserı öttı. Şaranyŋ ūiymdastyryluyna Esıl audany äkımdıgı, «Jas Otan» jastar qanatynyŋ Astana qalalyq filialy, elordalyq jastar mäslihaty jäne «Duman» oiyn-sauyq ortalyǧy ūiytqy boldy.
Köŋılı jarym jetkınşekterge barynşa köterıŋkı köŋıl-küi syilap, olardyŋ ömırge degen qyzyǧuşylyǧyn arttyruǧa, intellektualdyq damuyn jetıldıru, sana-sezımderın joǧarylatuǧa baǧyttalǧan şara üdesınen şyqty. Balalar aldymen söileitın aǧaş pen jylannyŋ ortalyqty tanystyruyn tamaşalap, mūhitaral men jungli jaiynda mälımet aldy. Estelık üşın suretke tüsıp, jaŋa formattaǧy 3D suretıne kuä boldy. Şaranyŋ basty jaŋalyǧy da sol – Astanaǧa Gollivudten äkelıngen «Dance heads» dep atalatyn ekı qūrylǧynyŋ bırı osy ortalyqta ornalasqan.
Ūiymdastyruşylar kışkentai büldırşınderge olardyŋ tüsken suretterın jiektemege salyp, syilady. Tättı balmūzdaqtan däm tatyp, qyzyqty treningterge qatysqannan keiın balalar balyqtardyŋ tür-türın kezıktıruge bolatyn mūhitaraldy qyzyqtady.
«Bız erteden «jetım körseŋ, jebei jür» degen ataly sözdı boiǧa tereŋ sıŋırıp ösken halyqpyz. Jetım balalar ata-ananyŋ meiırımınen aiyrylyp qana qoimai, ömırdıŋ auyr synyn bastan ötkeredı. Ondai jandarǧa qol ūşyn beru – bızdıŋ boryşymyz. Sondyqtan olarǧa qoǧam nazarynan tys qalmaǧanyn aŋǧartyp, qoǧamdyq ortaǧa baulu üşın şara ūiymdastyryp otyrmyz» deidı «Jas Otan» jastar qanaty Astana qalalyq filialynyŋ mamany Sevara Satybaldina.
Aigül ÖZEKOVA
