Esıldıŋ jaǧasynda el jüregı – elorda boi köterdı. Memleket basşysy Nūrsūltan Nazarbaevtyŋ bastamasymen Astananyŋ alǧaşqy uyǧy qadalǧanyna biyl 20 jyl toldy. Tarihi ölşemmen qaraǧanda, osynau az uaqytta Astana aty älemde asqaqtap şyqty. Būl – tūtas eldıŋ de, Elbasynyŋ da abyroiy. Qazır Elbasy men elorda bırın-ekınşısınen bölıp qarauǧa bolmaityn egız ūǧymǧa ainaldy.
Elordada Astananyŋ 20 jyldyq mereitoiyna arnalyp, sahnaǧa jol tartqan «Astana» publisistikalyq dramasynyŋ avtorlary osy jelını negızge aldy. Mädeniet jäne sport ministrlıgınıŋ qoldauymen Q.Qojamiiarov atyndaǧy Memlekettık akademiialyq ūiǧyr muzykalyq komediia teatry qoiǧan spektakl ideiasyn ūsynyp, rejisser retınde jüzege asyrǧan – Qazaqstannyŋ halyq ärtısı Mūrat Ahmadiev. Al dramany Nūrsūltan Nazarbaevtyŋ «Qazaqstan joly» kıtabynyŋ negızınde jazuşy Ahmetjan Aşiri jazyp şyqty.
Elbasy elordasyn Alataudan Arqaǧa köşıru turaly ūsynysyn 1994 jyldyŋ 6 şıldesınde Joǧarǧy keŋes otyrysynda aitqany belgılı. Alaida būl ideia el Prezidentınıŋ basyna sodan ekı jyl būryn kelgen. «Qazaqstan joly» kıtabynyŋ «Jaŋa däuırdıŋ jaŋa astanasy» atty tarauynda osy jaily Memleket basşysy: «Jaŋa astanaǧa köşu jäne ony salu turaly oi mende erterekte, sonau alystaǧy 1992 jyly tuǧan edı. Bıraq men ol kezde mūny auzymnan şyǧarmadym, öitkenı Qazaqstannyŋ ekonomikasy oilaǧandy ıske asyruǧa mümkındık bermedı» dep jazady. Al sol tarihi şeşımge alǧaşqyda qarsylyqtar bola qoiǧan joq. Būl turaly atalmyş kıtapta: «Aşyq aitaiyn, men astanany auystyru ideiasyna bailanysty bırtalai qatal synǧa tap boldym. Parlamentşıler menıŋ ideiamdy tynyş qana qabyldady desem, jalǧan aitqan bolar edım. Dauystar ekıge bölındı: eger de deputattardyŋ bırı menı sözsız qoldaiyq dep ūsynsa, ekınşı bıreulerı ünemı qiyndai tüsken äleumettık-ekonomikalyq jaǧdaida astanany auystyru üşın orasan zor qarjyny şaşu qisynsyzdyq dep, mülde des bermeitın qorǧanysta tūrdy. Aitys qyzu jürıp jatty, bıraq deputattar negızınen menı qoldamauǧa qarai oiysqan… Keiınnen, jaŋa astana taiau arada bola salatyn ıs emes, qalai bolǧanda da 20-30 jyldy kerek qylady dep oilaǧan deputattar astanany auystyrudy qoldap, dauys berdı. Qoldauşylardyŋ dauysy säl ǧana artyqşylyqpen basym tüstı» dep jazylǧan.
Dramalyq şyǧarmanyŋ ölşemderınıŋ bırın tartys qūraitynyn eskersek, «Astana» qoiylymy osyǧan sai keldı. Iаǧni astanany auystyruǧa qatysty talas-tartystar qamtyldy. Jarty jylǧa juyq daiyndalyp, 90 ärtıs qatysqan qoiylymda Elbasy beinesın Mädeniet qairatkerı Azizjan İskanderov somdady.
Nūrsūltan Nazarbaevtyŋ sol tarihi şeşımı dūrys bolǧanyn uaqyt körsettı. Bügınderı Astana jer-jahannan qanşama adamdardy tartyp, älemdık aituly şaralardy ötkızıp kele jatqan şahar retınde el nazaryna ılıktı. Elorda körkıne tamsanatyn jūrt ta köp. Sonyŋ bärı sahna tılınde söiledı.
