Nūr-Sūltan qalasynyŋ äkımı Altai Kölgınov Almaty audany tūrǧyndarymen kezdesıp, audandy ary qarai damytu mäselesın talqylady.
Atalmyş audannyŋ qūrylǧanyna 24 jyl toldy. Almaty audany qūrylǧannan berı jergılıktı tūrǧyndar sany 4 ese artty. Qazır mūnda 320 myŋǧa juyq adam tūrady. Qala basşysynyŋ tūrǧyndarmen kezdesuı 2,5 saǧatqa sozyldy. Jüzdesu barysynda äkımge sūraqtar qoiylyp, ūsynystar aityldy.
Qala tūrǧyndary apatty jaǧdaidaǧy eskı üilerdı süru, tūrǧyn üi keşenderın jöndeu, elektrlık qosalqy stansiialardyŋ jūmysy, äleumettık nysandar, kärız jelılerı, aulalar men qoǧamdyq keŋıstıkter salu, qosymşa avtobustar şyǧaru, kögaldandyru, tyǧyz salynǧan qūrylys, internet, su qysymy sekıldı türlı mäselelerdı köterdı.
– Elordany damytu mäselesı – Memleket basşysynyŋ tıkelei baqylauynda. Äleumettık nysandardy saludan bölek, basty mäselelerdıŋ bırı – kärız jelısı men şaǧyn elektr stansiialaryn salu. Byltyr 146 problemaly uchaskede su basu mäselesı şeşıldı. Sol üşın 130 şaqyrymnan astam nöser kärızı men aryq-naua jüiesı salyndy. Olardyŋ bır bölıgı Almaty audanynda ornalasqan, – dedı Altai Kölgınov.
Onyŋ aituynşa, audannyŋ ǧana emes, qalanyŋ eŋ problemaly tūstarynyŋ bırı – B.Momyşūly daŋǧylyn su basu mäselesı şeşıldı. Būl maŋaida jaŋbyrly künderı kölıkter belşesınen suǧa batatyn. Sol sebepten qoldanystaǧy nöser kärızı jelısınıŋ ötkızu qabıletın 1,5 ese arttyratyn nöser kärızınıŋ magistraldyq kollektory salyndy. Sol siiaqty Jastar şaǧyn audanynda (Täşenov pen Amman köşelerınıŋ qiylysy) jetkızuşı kollektorlar men özge de kärızderdı qaita salu arqyly tazartu qondyrǧysy ornatyldy. Olar köşeler men üilerdı su basudan saqtap qaldy.
– Almaty audanynda gaz taratu jelısı salyndy. Būl audanda 1700-ge juyq otbasy gazǧa köştı. Kögıldır otyn qala tūrǧyndarynyŋ ömırın ekologiialyq tūrǧydan jaqsartady. Almaty audanyna qarasty keibır eldı mekenderde jeldı künderı elektr jelısı ısten şyǧyp jatady. Būl problemany şeşu üşın «Qazbek» qosalqy stansiiasynyŋ qūrylysy jäne «Jūldyz» qosalqy stansiiasyn qaita jaŋartu jūmysy jürıp jatyr. Būl nysandardy kelesı jyly aiaqtaudy josparlap otyrmyz, – dedı qala basşysy.
Äkımnıŋ sözınşe, biyl Almaty audanynda bırqatar äleumettık nysandar (mektep, medisinalyq ortalyq, qoljetımdı tūrǧyn üi), 80 aula men qoǧamdyq keŋıstık, dene şynyqtyru-sauyqtyru keşenı, basqa da halyqqa qajet nysandar salynady.
Kezdesu barysynda qoiylǧan sūraqtardy şeşu mäselesı nazarǧa alyndy. Olardy oryndau uaqyty belgılenedı.
