ŪLT SANASYN SERPILTKEN SŪHBAT
Memleket basşysy Nūrsūltan Nazarbaevtyŋ Ūlytau törınde bergen sūhbaty halqymyzdyŋ ruhyna ruh qosyp, patriottyq sezımın arttyrdy. Jalpy alǧanda, ūltymyzdyŋ sanasyn serpılttı. Mūndai pıkırdı Ortalyq kommunikasiia qyzmetınıŋ brifingıne kelgen Parlament Senatynyŋ deputaty Särsenbai Eŋsegenov bıldırdı.
– Elımızdıŋ ötken tarihyn tereŋ zerttep, bügıngı ūrpaqqa jetkızu öte maŋyzdy. Osy tūrǧydan kelgende, täuelsızdık alǧanymyzdan bermen qarai Elbasymyzdyŋ tapsyrmasymen memlekettık deŋgeide auqymdy şaralar ıske asyryldy. Tarihymyzdy tügendeu üşın Tarih jyly belgılenıp, töl ruhaniiatymyzǧa qatysty dünieler jan-jaqtan jinaqtaldy. Ūlytau törınde bergen sūhbatynda Elbasy būǧan taǧy aiyryqşa nazar audaryp, tarihymyzdy tereŋdei zerttei tüsuımızge nazar audardy. Ülken bäiterektıŋ özı eger de tamyry tereŋde bolmasa, säl ǧana jelden sūlap tüsetını jönınde keltırgen mysalynyŋ artynda ülken män jatyr dep oilaimyn. Özınıŋ ötkenın, halqynyŋ salt-dästürı men tılın bılmegen eldıŋ bolaşaǧy būlyŋǧyr degen sözımen de kelıspeuge bolmaidy, – dedı deputat.
Memlekettık tıl mäselelerıne qatysty Elbasy saliqaly saiasat jürgızıp kele jatqanyn atap ötken halyq qalaulysy osy saladaǧy atqarylǧan ısterge toqtaldy. «Bügıngı taŋda memlekettık tıldı qoldauǧa qatysty arnauly jospar qabyldandy. Oǧan biudjetten qarjy bölınıp, jüielı jūmystar jürgızılıp jatyr. Sonyŋ arqasynda memlekettık tıldıŋ qoldanylu aiasy äjeptäuır keŋeiıp qaldy. Bır mysal aitsam, akademik Salyq Zimanov özınıŋ jazǧan tıl märtebesı turaly maqalasynda mynadai derekter keltırgen: «1989 jyly Qazaqstandaǧy 205 audannyŋ tek 25-ınde ǧana ısqaǧazdary memlekettık tılde jürgızıldı». Al, bügıngı künı jaǧdai müldem basqaşa. Memleket qoldauynyŋ arqasynda qazaq tılı barlyq memlekettık organdardyŋ ıs qaǧazdaryn jürgızetın tılge ainaldy» dedı ol.
Särsenbai Qūrmanūly Memleket basşysynyŋ «Qazaqstan-2050» strategiiasynda da tıl mäselesıne jete köŋıl bölınıp, 2025 jylǧa qarai el azamattarynyŋ 90 paiyzdan astamy memlekettık tıldı bıluı mındettelgenın eske aldy.
Dın mäselesın qozǧai kele, Elbasynyŋ «Bız eşqaşan öz dınımızden ajyraǧan joqpyz. Är uaqytta ata-babalarymyzdan bızge berılgen, salt-dästürımızge negızdelgen dındı saqtap kele jatyrmyz» degen sözın keltırdı. Alaida, täuelsızdıgımızdıŋ alǧaşqy jyldarynda eldı ıştei ırıtu maqsatynda jat piǧyldy dıni aǧymdardyŋ kırıp ketkenıne qynjylys bıldırdı. «Konstitusiiaǧa säikes Qazaqstan – zaiyrly memleket. Bıraq, osyǧan qaramastan, ūrpaqty jat dıni aǧymdardan saqtauymyz kerek. Būl tūrǧydan alǧanda, memlekettık organdarǧa ülken jauapkerşılık jüktelıp otyr. Bügıngı taŋda el azmattarynyŋ qūqyn şekteu joq. Qai azamat qai dınge bet būramyn dese de tyiym salynbaidy. Alaida, dın mäselesı – öte näzık. Sondyqtan, dın adamdary İslam dınınıŋ ızgılıgın aǧaiyn-tuystaryna, tūtas qoǧamǧa tüsındırıp jüruı kerek. Jalpy, adamdarǧa bır-bırımızge dos-bauyr ekenın ūǧyndyryp, älsız adamdarǧa kömektesu siiaqty jaqsy qasietterdı taratuymyz qajet. Elbasymyz özınıŋ sūhbatynda būǧan da toqtalyp öttı» dedı deputat.
Memleket basşysy N.Nazarbaevtyŋ ideiasynan tuyndaǧan Euraziialyq ekonomikalyq odaq turaly pıkırın de aita ketken halyq qalaulysy alyp qūrlyq kındıgınde, Europa men Aziianyŋ ortasynda otyrǧan memleketımız üşın odaq ūşan-teŋız paida äkeletının jetkızdı. Elbasynyŋ «Būl – taza ekonomikalyq odaq. Būdan saiasi astar ızdeudıŋ qajetı joq. Eger de täuelsızdıgımızge, memlekettıŋ tūtastyǧyna nūqsan keletın bolsa, kez kelgen odaqtan bas tartuǧa daiynbyz» degen sözın keltıre kettı.
Amanǧali QALJANOV