15 qazanda «Astana Opera» teatrynda Qazaqstan jäne Tatarstan Respublikalarynyŋ Halyq ärtısı Nūrjamal Üsenbaevanyŋ mereitoilyq konsertı ötedı. Belgılı opera änşısı sahnada jürgenıne 30 jyl toluyna orai, öz körermenderıne «Önerım – ömırım» atty konserttık baǧdarlamasyn ūsynbaq.
Keşke Ukrainanyŋ Halyq ärtısı İgor Borko (tenor), Cheh baritony – Filipp Bandjak keledı. Sonymen qatar «Astana Opera» teatrynyŋ solisterı Dina Hamzina, Medet Şotabaev, Meiır Baineşov öner körsetedı. Dirijerlyq tızgındı Tatarstannyŋ Halyq ärtısı – maestro Renat Salauatov ūstaidy. Konsert «Astana Opera» simfoniialyq orkestrı, hory jäne baletınıŋ qatysuymen ötedı.
Nūrjamal Üsenbaeva atalmyş konserttıŋ opera önerın süietın jäne baǧalaityn qauym aldynda tapsyratyn emtihan bolatynyn aitady. «Men osy baǧdarlamamen Qazaqstannyŋ özge qalalarynda konsert berdım. Alaida, «Astana Opera» teatrynyŋ äsem sahnasynda än salu – men üşın ülken jauapkerşılık ärı qūrmet» deidı ol.
Būl keşte körermen qazaq jäne Europa kompozitorlarynyŋ operalarynan üzındıler tyŋdai alady. Nūrjamal Üsenbaeva İgor Borkomen «Marjan ızdeuşıler» operasynan Leila men Nädır duetın, Filipp Bandjakpen «Saiqymazaqtar» operasynan Silvio men Nedda duetın şyrqamaq. «Men üşın sahnadaǧy barlyq keiıpkerlerım qymbat. Nege deseŋız, sol beinelerdı somdau barysynda boiyŋdaǧy barlyq qasietıŋdı şyǧaryp, janyŋdy beresıŋ. Ärbır keiıpker özınşe erekşe. Är oryndaǧan saiyn men ol beinenı būrynǧydan özgeşe, jaŋaşa oinaimyn. Osylaişa, roldı jäne özımdı jaŋa qyrynan tanimyn» deidı änşı.
