«Мейірімді қала» акциясының игілігі
Астана қаласы әкімдігінің ұйымдастыруымен кең ауқымда өткізіліп жатқан «Мейірімді қала» қайырымдылық акциясы әлі де жалғасып жатыр.
Кеше ел Тәуелсіздігінің 25 жылдығына орай ұйымдастырылып жатқан бұл шараға тек қана отандық өнімдер сатылатын «УниверМАG.kz» сауда орталығы үн қосып кәсіптік-техникалық колледжінің біраз студентіне қазақстандық өндірушілердің қолынан шыққан киім-кешектер жиынтығы табыс етілді.
«Қайырымдылық шарасы аясында Астанадағы кәсіптік-техникалық колледжінде білім алатын 20 студентке киім-кешектер жиынтығы мен кітаптар беріп отырмыз. Бұлардың арасында тұрмысы төмен отбасылардан шыққан және ата-анасынан айырылған студенттер, сонымен қатар облыстық, республикалық деңгейдегі жарыстарда жеңімпаз атанып жүрген үлгілі жастар бар. Көмек көрсету туралы бастамамызға еліміздің барлық кәсіпкерлері қолдау білдірді. Сондай-ақ, бұл шара «УниверМАG.kz» сауда орталығының бір жылдығына сәйкес келіп отыр» дейді Жеңіл өнеркәсіп өнімдерін өндірушілер одағының президенті Сәуле Шәуенова.
Шараға Астана қаласы әкімінің орынбасары Малика Бектұрова, елорданың кәсіпкерлік және өнеркәсіп басқармасы және «Атамекен» ҰКП өкілдері қатысты. Жалпы Астана қаласында кәсіпкерлікке ғана емес әлеуметтік мәселелерге, аз қамтылған отбасыларға қатты көңіл бөлініп келеді. Оған осы «Мейірімді қала» қайырымдылық акциясы куә болса керек.
Бүркіт НҰРАСЫЛ