«Нұрлы жер» бағдарламасын жүзеге асыру аясында елорда әкімдігінің қаулысымен «Елорда құрылыс компаниясы» ЖШС өкілетті ұйымы құрылып, «Проблемалы нысандар құрылысын аяқтауды қаржыландыру» тәртібі бекітілді. Өткен жылы бұл мақсатқа республикалық бюджеттен 40 млрд теңге бөлінді. Бұл туралы Индустрия және инфрақұрылымдық даму министрлігінде өткен баспасөз мәслихаты барысында айтылып, үлескерлердің мәселелері қалай шешіліп жатқандығы түсіндірілді.
Аталмыш министрліктің Құрылыс және тұрғын үй-коммуналдық шаруашылық істері комитеті төрағасының орынбасары Бақытжан Қашақовтың айтуынша, елордада 51 нысан проблемалы болып танылған. Оның он екісіне үлескерлер қоныстанып үлгерді. Қазіргі күні аталмыш нысандардың инфрақұрылымын іске қосу жұмыстары жүргізіліп жатыр. Ал 39 нысан аса проблемалы болып саналады. Республикалық бюджеттен бөлінген 40 млрд теңге осы нысандардың проблемасын шешуге бағытталды. Бұл қаржы екі траншпен бөлінді. 20 млрд теңгені құраған алғашқы транш төрт жыл мерзіміне қайтарымдылық негізде бөлініп отыр. Тиісті жұмыстармен «Елорда құрылыс компаниясы» ЖШС айналысып жатыр.
Тұрғын үй құрылысына кепілдік беру қоры төрағасының орынбасары Қанат Ибраевтың сөзінше, үлестік құрылыс елімізде тұрғын үй құрылысының шамамен алғанда 60 пайызын құрайды. Аталмыш қор өзінің қызметін бастаған күннен, яғни 2,5 жыл ішінде 25 нысан құрылысына кепілдік берген. Олардың жетеуі осы күндері пайдалануға берілді.
– Құрылыс салушының өтінішін қарауға бізге 15 жұмыс күні беріледі. Өтінішті қарап болған соң, рұқсат беруге немесе бас тартуға құқылымыз. Біз алдымен өтініш иесінің құрылыс салудағы техникалық тәжірибесіне, қаржысына және заң алдындағы тазалығына көңіл бөлеміз. Осы күнге дейін, негізінен, Нұр-Сұлтан және Алматы қалаларындағы нысандар құрылысына кепілдік бердік. Сондай-ақ Шымкент, Орал шаһарларындағы нысандарды сәтті іске қостық, – деді Қ.Ибраев.
