24-25 қазан күндері Астанада «Саха театрының аңыздары» бағдарламасының аясында П.А.Ойунский атындағы Саха академиялық театрының гастрольдері өтеді. Якутияның ұлттық театрының 110 жылдығына орай ТМД елдерін аралап жүрген өнер ұжымы елорданың Жастар театрының төрінде Якутия әдебиетінің негізін салушылардың бірі Алексей Кулаковскийдің «Шаманның түсі» және Сюзанна Ооржактың «Бернарда Альбаның үйі» спектакльдерін қояды.
Режиссер Руслан Тараховский қойған алғашқы спектакль философиялық мәтін, рухани музыка және пластиканың қоспаларынан тұрады. Оның бас кейіпкері рок музыкант қазіргі күйбең тірлікте өзін-өзі іздеп, үлкен сынақтардан өтеді. Ақыры рухани тазарып, халқының бастапқы болмысы мен табиғатына, наным-сеніміне оралады. Қойылымға «Чолбон» рок тобы қатысады.
«Бернарда Альбаның үйі» спектаклімен өнер ұжымы 2007 жылы «Алтын бетперде» атты ұлттық театр сыйлығының «Үздік спектакль», «Үздік режиссер» аталымдарында топ жарып, Степанида Борисова атты басты рөлді сомдайтын актриса «Үздік әйел бейнесі» аталымында жеңімпаз атанған.
Аталмыш қойылым – Арктика мемлекеттік мәдениет және өнер институтын 2006 жылы аяқтаған Сюзанна Ооржактың дипломдық жұмысы.
Оқиға Испания елінде, Бернарда есімді өктем әйелдің отбасында өрбиді. Оның бойжеткен, тұрмысқа шықпаған екі қызы бар екен. Қойылым олардың құпиялары мен армандары туралы сыр шертеді.
Аманғали ҚАЛЖАНОВ
