Л.Гумилев атындағы Еуразия ұлттық университетінде «Кәусар» мәденитанымдық бірлестігінің ұйымдастыруымен ҚР Еңбек сіңірген қайраткері, Халықаралық «Алаш» сыйлығының лауреаты, ақын Нәзікен Алпамысқызымен «Сырлы сөз» атты әдеби кездесу кеші өтті.
Әдеби шараны көмейіне бұлбұл қонған дарынды әнші Кенжеғали Мыржықбай әсерлі жүргізіп отырды. Бұған дейін де бұл шаңырақта талантты тұлға халқымыздың арда азаматтарымен кездесу өткізіп, емен-жарқын әңгіме өрбіткен еді. Ақын апамызбен өткен кеш те солардың жұғымды жалғасы болды.
Ел арасында батырлар мен ақындар мекені атанған Алматы облысының Жамбыл ауданында өмірге келген Нәзікен Алпамысқызы жастайынан өлеңге ғашық болып өседі. Орта мектепті алтын медальмен аяқтап, Қазақ мемлекеттік университетін қызыл дипломмен бітіреді. Одан шығандап, Мәскеудегі М.Ломоносов атындағы Мемлекеттік университетінің экономика
факультетінің аспирантурасын үздік тамамдайды. Өмірде басқа саланың құрығын ұстаса да, поэзияны ешқашан жанынан қалдырмаған. Барлық сырын соған төгіп отырған. Содан ба, ақын өлеңдерінен нәзік мұң мен сағыныш тоғыз таспалы қамшыдай өріліп отырады.
– Алғашқы топтамасымен-ақ поэзия әлеміне үлкен дайындықпен, ең бастысы, зор махаббатпен келген Нәзікен ақын содан бері өсу, өрлеу үстінде. Оның тақырып аясы да барынша кең. Бірде Тұмар ханымға айналып ел намысын жыртса, енді бірде лүп-лүп соққан жүрегін алақаныңызға салып береді. Ең бастысы, ол нені жырласа да, ойды жадағай айта салмайды, әркім өз зердесінен өткізетіндей тереңнен тартады. Жан сарайының есігін алдыңнан айқара ашады. Ондайда сіз де бар ықыласыңызбен ақынның шуақты сәттеріне ортақтасып, көңілі жабырқау тартса, бірге мұңданасыз, – деді шара барысында сөз алған жазушы Жұмагүл Солты.
Белгілі ғалым Серік Негимов ақынның жырларынан мысал келтіріп, дәлелмен сөйледі. Нәзікен апаның шәкірті, профессор Серік Мақыш ұстазына ақжарма тілегін айтты.
Кенжеғали Мыржықбай ақынның «Әсетке» деген өлеңін жатқа оқып, әйгілі Әсеттің әндерін төгілдіріп орын-
дады. Мүсілім Базарбаев, Хамит Ерғалиев және Қадыр Мырза Әлі секілді аузы дуалы тұлғалардың ақын туралы айтқан пікірлерін жұртшылыққа оқып берді.
Нәзікен Алпамысқызының өзі де жиналғандарға сырлы, мұңлы жырларын оқыды. Жастардың қойған сұрақтарына жауап берді. «Бұл күн менің өмірімде ешқашан ұмытылмайды. Тамаша жүздесу болды. Әрдайым жұртпен, жастармен кездескенді аңсап жүремін. Осындай парасатты кеш ұйымдастырған азаматтарға алғысымды
білдіремін» деді ақын.
Шара соңында университет проректоры Дихан Қамзабекұлы кеш иесіне ризашылығын білдіріп, оны «Күлтегін» медалімен марапаттады.
Азамат Есенжол
