Астана қаласы әкімінің арнайы тапсырмасы бойынша әкімдік жанынан баспасөз орталығы ашылған болатын. Кеше осы орталықта Астана қаласының Энергетика басқармасы жылыту маусымына байланысты алғашқы баспасөз мәслихатын өткізді.
Алдымен сөз алған Энергетика басқармасының басшысы Бақытбек Жапаев 1 қазаннан жылу беру басталатынын мәлімдеді.
– Бірінші кезекте қаланың әлеуметтік нысандарына жылу беріледі. Қазіргі уақытта денсаулық сақтау, білім және мәдениет нысандары жылыту маусымына 100 пайыз дайын. Энергия көздері, инженерлік желілер және тіршілікті қамтамасыз ету нысандарындағы тиісті жұмыстар уақытында аяқталған болатын. Белгіленген кестеден қалып қою жағдайы тіркелген жоқ. Елордада 2454 тұрғын үй қоры тіркеуге алынған болса, ондағы дайындық жұмыстары толық аяқталды десе болады, – деп мәлімдеді басқарма басшысы.
Оның айтуынша, биыл «Астана-Теплотранзит» АҚ бағдарламаға сәйкес 1,150 шақырым магистральді желіге күрделі жөндеу жұмыстарын жүз пайыз орындап шыққан. Ал 3 698 шаршы метр құбырдың жылу оқшаулағыштары қайта жөнделген. Сондай-ақ «Астана-РЭК» АҚ-ы да өздері жасақтаған бағдарлама негізінде 3631 шақырым ұзындықты құрайтын әуе электр желісінің біраз бөлігін күрделі жөндеуден өткізген. Аудандық қазандықтарға 19 мың тонна көмір отыны қажет болса, соның 16 мың тоннасы қазірдің өзінде жасақталған екен. Негізінде, көмір жеткізу жұмыстары кестеге сәйкес қазан айынан басталады. Қаланы жылумен қамтитын ЖЭО-1 және ЖЭО-2-нің дайындығы да жүз пайыз көлемінде орындалған.
– Өздеріңіз білесіздер, жылу үш кезең бойынша беріледі. Бірінші кезеңде 1 қазаннан тиісті нысандар жылуға қосылады. Екінші кезеңде тұрғын үй қорына жылу берілуі тиіс. Ол ауа райына байланысты жүзеге асырылады. Ауа температурасы 10 градус жылылықтан төмендесе және ол бес күннен астам уақытқа жалғасса, тұрғын үйлерге де жылу беріле бастайды. Ал үшінші кезеңде заңды тұлғалардың нысандары қосылады, – деп түсіндірді баспасөз жиынына қатысқан «Астана-Теплотранзит» АҚ басқармасының төрағасы Василий Курисько.
Меңдолла НҰРЫМҰЛЫ
