Жазушы мен ақын дүниеден өтсе де, артында сөзі қалады. Ақмола облысының Қорғалжын ауданынан түлеп ұшқан Смағұл Рахымбек өмірі де өнегемен өрнектелген еді.
Астана төріндегі Ұлттық академиялық кітапханада өткен жазда мезгілсіз дүниеден озған, бүкіл саналы ғұмырын баспасөз саласына арнаған журналист, ақын, жазушы және аудармашы Смағұл Рахымбектің «Жырларым менің сөйлесін» атты кітабының тұсаукесері өтті. Бұл жинаққа ақынның әр жылдарда жазған таңдаулы өлеңдері енгізілген. Сонымен қатар эпилог ретінде қаламгер ағамыздың жары Әлия Рахымбекованың «Менің мақсатым – Смағұлдың арманын жүзеге асыру» деп бастаған естелігі берілген. Онда өмірлік серігінің елін, ұлтын, туған жерін қалай сүйгені, шығармашылық жұмысы, қаламгер әріптестерімен қарым-қатынасы жайында баяндалыпты.
Қазақ әдебиеті мен поэзиясына, ұлттық журналистика саласына өзіндік үлес қосқан талантты азаматтың есімін еске түсіруге, жаңа жинағының тұсаукесерінде Алдан Смайыл, Айбатыр Сейтақ, Ерлан Бекқожин, Махат Садық, Амангелді Жұмабек, Бәдуан Имашұлы, Күләш Молдахметова, Мұратбек Тоқтағазин сынды бірге қызмет істеген қаламгерлер замандастары естеліктерін айтып, жырларын оқып, игі пейілдерін білдірді. Сондай-ақ қорғалжындық тілеуқор ағайындары да ақжарма тілектерін жеткізді.
Иә, ендігі жерде өмірге, жырға ғашық болып өткен ақынның өзі болмаса да, оның көзіндей болып қалған ақжолтай, өршіл өлеңдері сөйлей беретініне, көсемсөздері мен әңгімелері өскелең ұрпаққа өнеге болатынына бек сенімдіміз.
