«Мүгедек жастар қоғамы» ұйымы мен Астана қаласы кәсіпкерлерінің ұйымдастыруымен боулингті көзді жауып ойнаудан турнир өтті, деп хабарлайды astana-akshamy.kz.
Боулинг ойнау ешкімді таңғалдыра қоймайды. Ал боулингті көзді жауып ойнау әркімнің қолынан келе бермейді. Осы орайда «Думан» қонақ үйінде Астана қаласының кәсіпкерлерінен жасақталған 5 команда ерекше сайыста сынға түсті.
«Адамда 5 сезім мүшесі бар. Олар: көз, құлақ, тіл, мұрын, тері. Ал олардың ішінде көздің жабық болуы мидың дамуына тікелей әсер етеді. Сондықтан да осы жарысты ұйымдастыру идеясы ойымызға келді.
Қазіргі қоғамда мүгедектер жайлы жаңсақ қағида қалыптасқан. Көпшілігі мүгедек дегенде, оларды зейнетақы және тамақпен қамтамасыз етсе, жеткілікті деп ойлайды. Дегенмен, адам қандай жағдайда болса да, өзгенің мүсіркегенін қаламайды», — деді «Мүгедек жастар қоғамы» ұйымының төрағасы Мұрат Абдумомынов.
Ұйымдастырушылардың айтуынша, бұндай іс-шара екінші рет өткізілуде. Бұған дейін 2023 жылы қазан айында мемлекеттік орган қызметкерлері арасында да осы жарыс болған еді.
«Мүгедектердің жанын тек мүгедектер ұғынады. Ал сау адамдар денсаулық пен отбасының қадірін басқа түспейінше, түсіне бермейді. Соның анық дәлелі — пандемия уақытында анық білінді. Сен қанша ақша тапсаң да, өмірдегі басты дүние емес. Міне боулингті көзді жауып ойнау арқылы сау адамдар да өздерінің мүмкіндігі шексіз екендігін дәлелдегіміз келді», — деп Мұрат өз ойын түйіндеді.
Бәсекенің басында қатысушылардың жылдамдығы мен қарқыны қатты болғанымен, нысанадан мүлт кетіп жатты. Тек 10-15 минуттан соң ғана, олар ойынға бейімделді.
«Боулингке бос уақытымда достарыммен бірге барып, ойнаймын. Бүгінгі ерекше жарысты бірінші рет естідім. Жаңа дүние қашан да қызық қой. Бастапқыда шарды ұстау қиын болғанымен, уақыт өте келе көзге ғана емес, айналаны сезіммен сезіне бастайды екенсің» — деп, Әлішер атты қатысушы өз пікірін білдірді.
«Мүгедек жастар қоғамы» ұйымы алдағы уақытта тек боулингпен ғана шектелмей, күз мезігілінде Астанада бірінші рет желкенді спорттан да шара өткізу идеясы бар екенін айтты.
