АБЫЛАЙДЫҢ АСЫ. Ұлы ханын халқымыз ұмытпайды
Асыл текті Абылай ханның 300 жылдығына арналған мерекелік шаралар көрікті Көкшетау жерін дүбірлі думанға бөледі. Мемлекеттік хатшы Марат Тәжин бастаған бір топ зиялы қауым өкілдері мен алыстан ат арытып келген шетелдік қонақтар тарихтың тар кезеңінде таққа отырып, тарыдай шашыраған ұлтын ұйыстыра білген ұлы тұлғаның ескерткішіне тағзым етті. Қазақтың небір жақсы-жайсаңдары қатысқан бұл Абылай бабамыздың асы бүгінде төрткүл дүниеге тегіс танылған тәуелсіз мемлекетіміздің мерейін тасытып, айбынын асыруға септігін тигізеріне сеніміміз мол.
Ұлы Абылайдың ескерткішіне гүлшоқтарын қою рәсімінен кейін «Көкшетау» мәдениет сарайында «Абылай хан және оның тарихи дәуірі» атты халықаралық ғылыми-практикалық конференция өтті.
Алқалы жиынды Мемлекеттік хатшы Марат Тәжин ашып, жұртшылыққа Елбасы Нұрсұлтан Назарбаевтың құттықтау хатын оқып берді. «Абылай ханның 300 жылдығы – елдігіміздің бедерлі бір белесі. Осыған орай халықаралық конференцияның ұйымдастырылуы да, оның айбынды ханымыз орда тіккен киелі Көкше жерінде өткізілуі де орынды. Біз бұл жиында Абылай ханның ерекше еңбегін ашып көрсетумен шектеліп қалмауымыз керек. Бәрінен бұрын Абылай ханның қолы неге жетті, неге жетпеді, бабамыз нені армандады, бізге нені аманаттады, болашақ ұрпақтарынан нені күтті, келер күндерге нені ескертті, біз сол заманның тарихынан қандай тағылым аламыз деген сауалдарға жауап іздеп, табуға тырысу керек…» делінген құттықтау хатта.
Конференцияда негізгі баяндаманы Л.Н.Гумилев атындағы Еуразия ұлттық университетінің ректоры Ерлан Сыдықов жасады. Ол Абылай ханның қайраткерлігі мен тұлғалық болмысын, ерлік істері мен жүріп өткен жолдарын кеңінен сөз етті. Ғалымның айтуынша, хан Абылай – Қазақстан тарихындағы тағдырлы бір кезеңнің күллі тауқыметін бойына жүктеген тұтас бітімді тұлға. Ұлы қолбасшы ел билеген кезеңінде жойқын өзгерістер жасап, Қазақ Ордасының іргесін одан әрі нығайтуды көздеді. Қазақ елінің айбынын асыру мен ордасын орнықтыруды басты міндеті санаған Абылай мемлекетшіл парасатымен, жаужүрек батырлығымен, кемел қолбасшы, көреген қайраткерлігімен, сұңғыла бітімгерлігімен хандық дәрежеге көтеріліп, өз төңірегіндегі жақсылар мен жайсаңдардың, әртүрлі әлеуметтік топтардың қолдауына ие болған.
Қазақтың тарихи жырларындағы Абылай ханның даңқты бейнесі туралы сөз қозғаған Ерлан Сыдықов жас сұлтанның ел тізгінін қолына алғаш алған кездегі күрделі кезеңдерін, ауыр міндеттерін, жоңғар шапқыншылығымен күрескен ерен ерлігін баяндамасына арқау етті. «Абылай ел ісімен енді шұғылдана бастаған шақта Қазақ хандығы сиырдың бүйрегіндей бөлшектенген бытыраңқы хәлге жуық тұрған болатын. Тек XVIII ғасырдың 60-жылдарына қарай билеушінің төңірегіне саяси элита біршама тығыз топтасты. Аумағы азат, көлемі кең мәртебелі мемлекет шын қуатына мінді. Қалмақтан тазартылған Тарбағатай, Жетісу өлкелерін өркендетуге басым көңіл бөлінді.
Ұлттың тұрмыс-тіршілігінде қордаланған мәселелер де Абылайдың басты назарында болды. Ол бірде күшпен, келесі бірде келісіммен қазақ қоныстарында тәртіп пен тыныштық орната білді. Уақыт өте келе, ақсақалдар билігін әлсіретіп, басқарудың дәстүрлі институттарын қайта жандандыруға күш салды. Сот жүйесін нығайтты. Өзінің құзіретін хан болып сайланған кезде белгіленген шектерден асыра кеңейтті. Абылайдың салиқалы да сауатты саясатының нәтижесінде ішкі саяси ахуал тұрақтанып, Шыңғыс әулеті мен ақсүйектердің өзара тартысы ты-йылды, қазақтың барша этникалық территориясы азат етілді» деп атап өтті ғалым.
– Қазақ тағдыры қыл үстінде тұрғанда бытыраған үш жүзді бірлікке ұйытып, жағадан алған жауға тойтарыс берген ұлы ханды дәріптеу, ерлік істерін насихаттау, тарихтағы рөлін айқындау – ғалымдардың алдында тұрған басты міндеттердің бірі. Алайда, Абылай ханның мемлекеттілікті жаңғырту, нығайту, ұлттың басын қосып, тұтас мемлекетке ұйыстыру жолындағы қайраткерлік еңбегін кешенді зерттеу тарихшылар назарынан тыс қалып келді, – дейді Ерлан Сыдықов. – Сондықтан отандық тарихнама өз әдіснамалық және тілдік құралын айтарлықтай өзгерту қажет. Ұлттық тарих ғылымының алдында жауапты да маңызды міндеттер тұр. Бұл – тарихшылардың да кәсіби жауапкершілігін аңғартатын іс. Мәселенің оңтайлы шешілуіне Елбасының идеясы арқасында дүниеге келген «Тарих толқынындағы халық» атты арнайы тарихи зерттеулер бағдарламасы ықпал етуге тиіс.
Бұдан кейін сөз Абылай ханның ұрпағы – Ресей Ғылым академиясы Тарих институтының ғылыми қызметкері Найля Бекмахановаға берілді. Ол біртуар тұлғаның дипломатиялық іскерлігіне, жер, су мәселесін шешудегі еңбегіне тоқталды. «Патша үкiметi қазақтар иелiк ететiн жердің кеңеюін құптаған жоқ. Ал, қазақтардың мал шаруашылығымен айналысуына Ертiс, Тобыл, Есiл өзендерiнiң аумағындағы жер таршылық еттi. Жер мәселесiн шешуге мемлекеттiк қайраткер Абылай хан тiкелей қатысып, Ресей патшалығымен хат жазысқан» дейдi баяндамасында Найля Бекмаханова. Ол Абылай ханның дипломатиялық шеберлігі арқасында бірқатар жер қазаққа қайтарылғанын айтты.
Жиында сөз сөйлеген белгілі ғалым Тұрсынбек Кәкішев отандық тарихшылар Қытайға барып, Абылай ханға байланысты тың деректер тауып әкелгенін атап өтті. Ұлттық намыс, елдік келбетіміз туралы ақсақалдық уәжін айтқан ғалым ұлттық намысымызды қайрайтын, дербес еліміздің ешкімнен кем еместігін көрсететін нақты істерге көшу қажеттігін, ел басқарған азаматтар алдымен ұлттық мақсаттарға қызмет етуге тиістігін қадап айтты. Елдігімізді күшейтіп, рухымызды көтеретін осындай шаралар мемлекеттік деңгейде тойлану қажет деген абыздық ақылын да жеткізді.
Абылай ханның 300 жылдық тойына оның ұрпақтары да арнайы келіпті. Конференция барысында олар Елбасына Абылай ханның бюстін сыйға тартты.
Кешкісін мерейтойға орай Абылай хан алаңында және «Көкшетау» мәдениет сарайында концерт өтті.
Ал ертеңінде, яғни 6 қазан күні Көкшетау маңындағы Қызылжар ипподромында «Азат рухтың Абылай ханы» атты театрландырылған қойылым сахналанды. Мұнда Абылайдың тәуелсіздік жолындағы күресі, ұлы жорықтары, сыртқы саясаттағы өлшеусіз еңбектері туралы көріністер берілді.
Абылай орда тіккен Көкше өңіріндегі тойда 100-ге жуық киіз үй тігіліп, олардың әрқайсысында көшпенділердің өмірін суреттейтін тұрмыстық заттар, зергерлік бұйымдар, қолданбалы өнер туындылары қойылды.
Ұйымдастырушылардың айтуынша, ат спорты шараларына Астана мен Алматы қалаларынан және он екі облыстан шабандоздар келіпті. Түске қарай ипподромда 7 шақырымдық жорға мен құнан бәйгесі, 16 шақырымдық тоқ бәйге, 25 шақырымдық аламан бәйге жарысы өткізілді.
Талғат БАТЫРХАН,
Қымбат ТОҚТАМҰРАТ,
Гүлмира АЙМАҒАНБЕТ
СҮБЕЛІ СӨЗ
Бүркітбай АЯҒАН,
Тарих ғылымдарының докторы, профессор:
Бабамызға – мың тағзым
Абылай хан мерейтойы – тәуелсіздік тарихындағы айтулы оқиға. Қазіргі уақыт тұрғысынан қарасақ, Абылайдың қазақ хандығының беделін көтеруге, қазақ мемлекетінің тәуелсіздігі мен біртұтастығын қорғау ісіне сіңірген еңбегі орасан зор. Жаңа заман тарихында Ресей үшін Бірінші Петр, Германия үшін Отто Бисмарк қандай қызмет етсе, Абылайдың да қазақ халқын ел етудегі қызметі сондай. Мұхтар Әуезовше тарқатсақ, «Қазақтың дербес ел болуына, әрі-беріден соң сол қазақтың қазақ болуына, басы қосылып бір жеңнен қол, бір жағадан бас шығаруға еңбек сіңірген Абылайдан артық адам болмас».
2012 жылдың шілдесінде Көкшетаудағы Абылай хан ескерткішінің жанында зиялы қауым өкілдерімен кездесуінде Елбасымыз: «Абылай хан қала сала алмадым деп еді, қала салдым. Халқымның басын қоса алмадым деп арманда кетсе, халқымның басын құрап, егемен ел еттім» деген болатын. Қазақ елін бүгінде әлем таниды. Абылайдың артында жасампаз халқы, асқаралы Астанасы бар, орындалған асыл мұраты бар, бейбітсүйгіш елі бар. Қасиетті қара шаңырақтың астына біз тек қазақтың ғана басын қосып қоймай, түрлі этнос өкілдерін біріктіре алдық. «Елге ел қосылса – құт» дейді қазақ даналығы. Әрқилы мәдениет өркениеттері қазақ жерінде тоғысып отыр. Конфессияаралық қатынастар орнықты қанат жаюда. Күллі бұқараның көксегені – бейбітшілік, татулық және ел ырыздығы.
Жаңа Астана тұрғызу – Абылай бабаның орындалған асыл арманы, ұлтының намысы, ұрпағының мақтанышы.
Қазақ халқының жадында Абылай қажырлы мемлекет қайраткері, батыл қолбасшы, дарынды дипломат ретінде сақталды және сақтала береді. Егемендік жылдары бабамыздың ұлт тәуелсіздігі жолындағы тынымсыз күресіне бүгінгі ұрпақтың тағылымы мен құрметі іспеттес Алматы мен Астана қалаларының қақ ортасынан Абылай хан даңғылы ашылды. Жетісу мен Көкше жерінде ескерткіші бой көтерді. Қазір бауырлас Түркия елінде Абылай хан атындағы саябақ бар. Алматыдағы Халықаралық қатынастар және әлем тілдері университеті Абылай есімімен аталады. Тәуелсіздік алған соңғы 20 жылда Абылай аты асқақтап, отансүйгіштіктің, көрегенділік пен кемеңгерліктің нышанындай кеңінен танылып, насихатталуда.
Бүгін біз тәуелсіз ел ретінде, барша қазақтың ұранына айналған арыстандай айбатты Абылай бабамызға құрмет көрсетіп, аруағы алдында тағзым етеміз!
Сәбит ЖӘМБЕК,
Ш.Уәлиханов атындағы Көкшетау мемлекеттік университетінің доценті:
Орыстар Абылайдың бостандыққа шығуын қолдамаған
Ресейдің көптеген деректерінде «Абылайды Қалдан Сереннің қамағынан орыс әскерінің майоры Миллер мырза азат етті» делінетін жансақ пікір қалыптасқан. Шынымен солай ма? Деректерге жүгініп көрелік. Егер орыстар шынымен Абылайды азат етуді ізгі мақсат тұтса, патшаға патша хат жазуы керек еді ғой. Бірақ К.Миллер Қалдан Серенге патшаның емес, Орынбор губернаторы И.Неплюевтің хатын апарды делінеді. Жоңғарияға бара жатқан жолында К.Миллер қазақтармен кездескенде Ұлы жүздің батыры – Наурыз оның «Абылайды азат етуге бара жатырмын» деген сөзіне сенбей, хатты көрсетуін талап еткен. Бірақ Миллер ол хатты қазақтарға көрсетпеген. Миллер мырзаның хатының сыры әлі күнге дейін ашылған жоқ. Жоңғарлар Миллердің өзін екі ай қамақта ұстаған. Бұл жоңғарларды шығысынан Чин державасы мен Халха моңғолдардың бірлескен күші қысып келе жатқан кез болатын. Жоңғарлар өз келешегін ойламауы мүмкін емес. Екіншіден, моңғол билеушілерінде Шыңғыс хан нәсілдерін қастерлейтін салт бар. Абылай хан ұрпағы. Үшіншіден, Төле би бастап барған қазақ өкілдерінің салмағы күшті болды. Қалдан Серен Абылай сұлтанды азат етіп қана қоймай «қазақ-жоңғар арасында тату көршілік бітіміне» қол қойып, Жоңғар ханы қазақ елшілерінің әрқайсысына алтынмен аптаған қылыш, күміспен күптеген белбеу сыйға тартқан. Кейінірек Абылай хан Даваач, Әмірсаналарды Чин державасына қайтарып бермеуіне аталған бітім, онда алған міндеттемелер әсерін тигізген. Орыстар Абылайдың бостандыққа шығуын қолдамағаны былай тұрсын В.Моисеевтің айтуынша, Абылайдың босап шығуы Ресей билігін қатты алаңдатқан. В.Моисеев осыған байланысты И.Неплюевтің Сыртқы істер коллегиясына жіберген хатынан үзінді келтірген. Онда И.Неплюев «Абылайдың еркіндік алуы өте қауіпті» деп жазған.
Рашид ОРАЗОВ,
Ш. Уәлиханов атындағы Тарих және
этнология институтының ғылыми қызметкері:
Ұлы ханның ұрпақтары
Тарихта Абылайдың 30 ұлы, 40 қызы болғандығы белгілі. Кенесары ханның Әбубәкір деген баласынан тарайтын белгілі күйші Файзолла Үрмізов ақсақал 30 ұлды былайша таратады.
1. Сайман ханымнан: Уәли, Шыңғыс, Әділ, Есім атты төрт ұл.
2. Бабақ ханымнан: Шеген, Үрістем, Оспан, Сыздық, Әбітай, Әбдолла атты алты ұл.
3. Бопыш ханымнан: Тоқ, Қосым, Арық атты үш ұл.
4. Хоша ханымнан: Қасым, Қамбар атты екі ұл.
5. Тоқта ханымнан: Сығай, Сүйік, Тағай атты үш ұл.
6. Өріс ханымнан: Шама, Байыр атты екі ұл.
7. Түлек ханымнан: Шағатай, Дәуім, Бәшен атты үш ұл.
8. Топыш ханымнан: Қара, Есен атты екі ұл.
9. Сайын ханымнан: Жанатай атты бір ұл.
10. Шаған ханымнан: Мақан, Маймақ атты екі ұл.
11. Мақтұм ханымнан: Самырат, Мұсахан атты
екі ұл тараған.
Шот-Аман УӘЛИХАН,
Абылай ханның ұрпағы:
Есімі мәңгі ел есінде
Ең күрделі сабақ – тарихтың сабағы. Оны оқымай, білмей, терең бойламай, әрі беріден соң пысықтамай ілгері басуға болмайды. Талай тайпалардың гүлденуі де, күйреуі де осында жатыр. Адам енді қайтып баспаймын деген жерін басады, енді көрмеймін деген жерін қайта көреді, тарихи жады жоғалған ел отқа екі-үш рет күйеді. Тарих тәлімін алу процесінде қазақ халқы бақытты болды деуге болмайды. Алты-жеті ғасыр бойғы тарихын есіне сақтап, жатқа айтатын дәстүрі бар халық бөтен тәрбиеге көшті, атадан балаға жеткен сөзді ұмытты, үлгі-өнегелеріне мұрын шүйіріп, мәңгүрттік қалыпқа ене бастады.
Біз қалай өстік, қандай тәлім-тәрбие алдық? Өзінің дамуындағы табиғи бағытын өзгерткен, қорек табатын тарихи тамырына балта шабылған біз уызға, ана сүтіне жарымадық. Мектепте қазақ тарихын оқымағанымыз былай тұрсын, ара-кідік шығатын кітаптарда ынжық, топас, өзімізді, кейде халық мүддесін сатқан сатқындарды мақтап, мадақтап, елі, жұрты үшін шүберекке жанын түйгендерді жау деп санадық. Біз қазақ хандарының тарихынан гөрі, Екатерина екінші патшаның неше байы болғанын жақсырақ білдік. Франция, Ұлыбритания корольдарының сарайында не өсек-аяң болғанын көзбен көргендей соқтық.
Қазақ тарихы өмірдің тәлкегіне түсіп, тұтқын адамға ұқсады, қасқыр тартқан қойдай қан-қан болып бізге жыртық-жыртық, көп беттері сарғайған, өшкен қалпында жетті. Ал, адамдардың тартқан азабы қаншама десеңізші?! Абылайханов, Уәлиханов, Қасымханов, Кенесарин болғандығы үшін жазықсыз қудаланған, түрмеге отырған, атылған ата, әке, ағаларымыздың ақ жарқын, бейкүнә келбеті көз алдымыздан кетпейді. Айта берсе, Абылайдың өзі көп жылғы саяси тұтқыннан бүгін ғана оралып отыр. Бұл оның сонымен өмірінде үш рет тұтқында болуы, жетті енді! Мен бұл жерде, сіздердің алдарыңызда білгірсімей-ақ қояйын, бәріміздің басымыздан кешкен, жүрекке тікенек боп жабысқан жағдай ғой.
Өшкеніміз жанып, өлгеніміз тіріліп жатқан кезде еркіндіктің самалы бәрімізге жетіп, баянды болса екен. Шығыс тарихын зерттеуші ғұлама, атақты академик Бартольд айтқандай, Абылай хан «XVIII ғасырдағы хандардың ішіндегі ең құдіреттісі болды» .