Әкімдік сайты рекордқа қол жеткізді
Астана қаласы әкімінің сайты «Астана таңдауы» байқауының арқасында Казнетте рекорд жасады. Қалалық әкімдіктің ресми интернет ресурсы astana.kz сайтында 10 күннің ішінде 25000-нан астам пайдаланушы пайда болды.
Қала тұрғындарының мұнша назар аударуына себеп болған қаланың 15 жылдығына орайластырылған басты іс-шараның бірі – әлеуметтік саладағы үздік қызметкерлерді таңдайтын «Астана таңдауы» байқауы болып отыр.
Жалпықалалық «Астана таңдауы» байқауының басты мақсаты – қалалықтардың пікірінше, үздік ұстазды, қоғамдық көлік жүргізушісін, инспектор мен дәрігерді, энергетик пен жолшыны және құрылысшыны анықтап, соларға дауыс беру. Дауыс берудің аяқталуына небары 5 күн қалды. Мамандардың болжамы бойынша, осы кезеңде порталға кірушілер саны 40 мың адамға дейін жетуі мүмкін. Бүгінде Казнеттегі бірде-бір интернет алаңы 2 аптада виртуальді кірушілер санының осыншама қарқынды өсуімен бұл көрсеткішке теңесе алмайды, – деп атап көрсетеді Астананың 15 жылдық мерекесін әзірлеу және өткізу жөніндегі ұйымдастыру комитеті штабының медиа тобы. Астана әкімдегі сайтындағы дауыс беру жүйесі белгілі бір үміткерге электронды мекен-жайда тек бір дауыс беруге ғана мүмкіндік туғызады. Осы тұрғыдан алғанда дауыс берулер нәтижесі барынша шынайы, әділетті және нағыз өз ісінің көшбасшысын айқындауға бағытталған. Дауыстың көпшілігі мұғалімдер мен дәрігерлерге берілген. Әрбір тұрғын өз ұстазын ең үздік деп санайды. Қазірдің өзінде мұғалімдерге 2000-нан астам дауыс берілді. Бүгінде дауыс саны бойынша әрбір аталымда әлеуетті көшбасшы анықталды. Дегенмен, 5 күнде жағдай түбегейлі өзгеруі мүмкін, деп санайды ұйымдастырушылар. Жалпықалалық «Астана таңдауы» байқауының жеңімпаздары халықтың сүйіспеншілігіне ие болумен қатар, материалдық сыйлықтар мен жүлделер алады.
Еркежан СӘТІМБЕК