ҚР Тұңғыш Президенті күні қарсаңында елордадағы жалпы білім беретін мектептерде оқитын 10-сынып оқушыларының арасында «Елордалық білім беру мекемелерінің көшбасшы оқушысы» V қалалық зияткерлік байқауы өтті.
Айтулы шара осымен бесінші мәрте өтіп отыр. Алғашқы сайыстың тақырыбы Елбасының даңғыл жолына арналған еді. Биылғы байқау – алаштың ардақты тұлғасы, тарихшы, публицист Әлихан Бөкейханның 150 жылдық мерейтойына орай өткізілді.
Сайыстың мақсаты – жастардың білімге деген қызығушылығын оятып, оларды отансүйгіштік рухта тәрбиелеу. Байқауда көшбасшылық қабілеттері мен шешендік шеберліктері төселген, қоғамдық жұмыстарға белсенді араласатын 12 оқушы бақ сынады. Көрнекті тұлғаның қайраткерлік қыры мен өмір жолы туралы салмақты ойлар айтылды. Пайымды пікірлер қозғалды. Жеткіншектер туған елінің тарихынан терең хабардар екендерін көрсетті.
Үш кезеңге бөлінген байқаудың нәтижесі бойынша бірінші орынды елордадағы №64 мектеп-лицейдің оқушысы Алан Несіпбек иеленсе, ал бас жүлдені №8 мектептің оқушысы Дидар Сейітхан жеңіп алды.
Азамат ЕСЕНЖОЛ
