بۇگىن وتباسىمەن سايلاۋعا بەلسەندى قاتىسقاننىڭ ءبىرى – بەلگىلى جازۋشى-دراماتۋرگ روزا مۇقانوۆا. ول وتباسى مۇشەلەرى ساياسي ناۋقانعانعا بەلسەندى قاتاسىپ, ءوز تاڭداۋىن جاساعانىن ايتتى.
– بۇگىن اۋا رايى ەرەكشە بولىپ تۇر. قىس بولسا دا جىلىمىق بار. تاڭەرتەڭ ەرتە №329 سايلاۋ ۋچاسكەسىنە بارىپ, ءوز تاڭداۋىمدى جاسادىم. ۇلىم الپامىس گونكونگ قالاسىندا جاساندى ينتەللەكت سالاسىندا ينجەنەر بولىپ جۇمىس ىستەيدى. ال قىزىم ارۋزا گونكونگ عىلىم جانە تەحنولوگيا ۋنيۆەرسيتەتىندە وقيدى. ەكەۋى دە داۋىس بەرىپ, ازاماتتىق تاڭداۋىن جاسادى.
مەملەكەتتىك سىيلىقتىڭ لاۋرەاتى, جازۋشى-دراماتۋرگ اكىم تارازي دەنساۋلىعىنا بايلانىستى سايلاۋ ۋچاسكەسىنە بارا المادى. الايدا ساعات 12.00-دە سايلاۋ ۋچاسكەسىنىڭ ماماندارى ۇيگە كەلىپ, جارىم تاڭداۋ جاساۋىنا مۇمكىندىك بەردى, – دەدى قالامگەر روزا مۇقانوۆا.
سايلاۋ – كەز كەلگەن ەل ءۇشىن ماڭىزدى وقيعا. مۇنى ەلدە جانە شەتەلدە جۇرگەن ءاربىر قازاقستان ازاماتى تەرەڭ ءتۇسىنۋى ءتيىس. قر سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆتىڭ ايتۋىنشا, جاپونيا مەن كورەيا رەسپۋبليكاسىندا جۇرگەن قازاقستاندىقتار ءبىرىنشى بولىپ داۋىس بەردى. سول قاتاردا گونكونگتە تۇراتىن الپامىس پەن ارۋزا دا سايلاۋعا قاتىستى.
– سايلاۋعا كەلگەن حالىقتىڭ كوڭىل-كۇيى كوتەرىڭكى ءارى بەلسەندى. ولار قوعامدا ادىلەتتىلىك ورنايتىنىنا سەنىمدى. ءوز باسىم ءادىل جانە قۋاتتى قازاقستان ءۇشىن, ءاربىر وتباسىنىڭ ءال-اۋقاتى جوعارى بولۋى ءۇشىن داۋىس بەردىم. ويتكەنى بۇگىنگى سايلاۋ ەلدە جۇرگىزىلىپ جاتقان ساياسي رەفورمالاردى ورنىقتى جۇرگىزۋدىڭ جولى, ۇلتتىڭ ارمان-مۇددەسىن جۇزەگە اسىرۋدىڭ تەتىگى دەپ بىلەمىن, – دەدى جازۋشى.
