جاڭا وقۋ جىلى قارساڭىندا استانا قالاسى ىشكى ىستەر دەپارتامەنتى جەرگىلىكتى پوليتسيا قىزمەتى جۇرگىزۋشىلەردى جولدا اباي بولۋعا شاقىرادى.
اسىرەسە, بالانىڭ قاۋىپسىزدىگىنە ۇقىپتى بولىپ, ارنايى قوندىرعىلاردى قولدانۋعا كەڭەس بەرەدى.
جولدا كولىك قانداي دا ءبىر اپاتقا ۇشىراسا, ۇلكەندەردەن گورى بۇعاناسى ءالى قاتپاعان بالا كوبىرەك زارداپ شەگەدى. ءتىپتى اۆتوماشينا وقىستان تەجەگىشتى باسسا دا, بالا جاراقات الۋى مۇمكىن. وسى جەردە بالانى ۇستاۋ قۇرالىنىڭ پايداسى كوپ ەكەنى ايتپاساق تا تۇسىنىكتى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا مۇنداي قوندىرعىلاردىڭ بولۋى جول اپاتى كەزىندەگى بالا ءولىمىن – 54 پايىزعا, جاراقات الۋىن – 76 پايىزعا, دەنساۋلىعىنا اۋىر زيان كەلتىرۋدى 92 پايىزعا ازايتادى ەكەن.
ءىىد جەرگىلىكتى پوليتسيا قىزمەتىنىڭ ينسپەكتورى ءلاززات بيسەمباەۆانىڭ ايتۋىنشا, 12 جاسقا دەيىنگى بالالاردى تەك ارنايى ۇستاۋ قۇرىلعىسىمەن نەمەسە قاۋىپسىزدىك بەلدىگى, كولىك قۇرالىنىڭ كونسترۋكتسياسىندا كوزدەلگەن وزگە دە قۇرالدار بولعان كەزدە عانا كولىكتە الىپ جۇرۋگە بولادى. ال مەحانيكالىق كولىك قۇرالىنىڭ الدىڭعى ورىندىعىندا بالالاردى ارنايى ۇستاۋ قۇرىلعىسى بولماسا, وتىرعىزۋعا بولمايدى. زاڭنىڭ وسى تالابىن بۇزعاندارعا 5 ايلىق ەسەپتىك كورسەتكىش كولەمىندە ايىپپۇل سالىنادى. جىل باسىنان بەرى ەرەجەنى ەلەمەگەن 520-دان استام جۇرگىزۋشى اكىمشىلىك جاۋاپكەرشىلىككە تارتىلعان ەكەن.
ارينە, ءبارىمىزدىڭ بارىمىز دا, باعىمىز دا – بالامىز. سوندىقتان كولىكتەگى ەڭ قادىرلى جولاۋشىمىزدىڭ قاۋىپسىزدىگى بارىنەن دە جوعارى تۇرۋى كەرەكتىگىن جۇرگىزۋشىلەر ءاردايىم ەستە ساقتاعانى ءلازىم.
قىمبات نۇرعالي
